,,ნაციონალური მოძრაობის" წევრი სერგო რატიანი გუშინ პარლამენტის თავმჯდომარის დავით უსუფაშვილის მიერ საზოგადოებრივ მაუწყებლის სამეურვეო საბჭოს დაკომპლექტებასთან დაკავშირებით გაკეთებულ განცხადებას ეხმიანება. როგორც საკითხის კომენტირებისას რატიანმა განაცხადა უსუფაშვილმა ვერ მოახერხა დაეცვა ის კომისია რომელიც თავად დააკომპლექტა და რომელმაც ქართული საზოგადოებისა და აკრედიტებული დიპლომატიური კორპუსის გარკვეული ნდობა მოიპოვა.
,,გუშინ პარლამენტის თავმჯდომარემ განაცხადა, რომ საზოგადოებრივი მაუწყებლის სამეურვეო საბჭოს დაკომპლექტებასთან დაკავშირებული პროცესების წარუმატებლობაზე პასუხისმგებლობა მას ეკისრება. ჩვენი შეფასებით, ეს იყო პირადად პარლამენტის თავმჯდომარის მიერ დაგეგმილი და წარმართული პროექტის წარუმატებლობა. პასუხისმგებლობა კი მთელ უმრავლესობას ეკისრებოდა. მაგრამ სრულად პასუხისმგებლობა პარლამენტის თავმჯდომარეს მას შემდეგ ეკისრება, რაც ბატონმა დავითმა არ გაითვალისწინა არასამთავრობო ორგანიზაციების მოწოდება და განაცხადა, რომ მეურვეობის კანდიდატთა შესარჩევად იგი ახალ კომისიას დააკომპლექტებს. 27 იანვარს არასამთავრობო ორგანიზაციებმა საქართველოს პარლამენტს მიმართეს, რომ ახალი კონკურსის ორგანიზების შემთხვევაში, მეურვეობის კანდიდატთა შერჩევა კომისიის ძველმა შემადგენლობამ უზრუნველყოს, რათა კომისიის მიერ უკვე მოპოვებული ნდობა საბჭოს დაკომპლექტების საბოლოო შედეგშიც აისახოს, იყოს გარანტირებული. პარლამენტის თავმჯდომარემ ვერ მოახერხა უმრავლესობის წინაშე დაეცვა ის კომისიაც კი, რომელიც თავად დააკომპლექტა და რომელმაც ქართული საზოგადოებისა და აკრედიტებული დიპლომატიური კორპუსის გარკვეული ნდობა მოიპოვა", _განაცხადა რატიანმა.
