საქართველოს პრემიერ-მინისტრის ოფიციალური ვიზიტი ისრაელში დასრულდა. ვიზიტის ფარგლებში ირაკლი ღარიბაშვილმა შეხვედრები გამართა ისრაელის პრეზიდენტ შიმონ პერესთან, პრემიერ-მინისტრ ბენიამინ ნეთანიაჰუსთან, საგარეო საქმეთა მინისტრ ავიგდორ ლიბერმანსთან და შინაგან საქმეთა მინისტრ გიდეონ საარსთან. შეხვედრები თბილ, მეგობრულ გარემოში წარიმართა და დაისახა სამომავლო თანამშრომლობის პერსპექტივები. ორ ქვეყანას შორის ეკონომიკური ურთიერთობების გაღრმავების ერთგვარ გარანტად იქცა საქართველო-ისრაელის მთავრობათაშორისი ერთობლივი ეკონომიკური კომისიის დამფუძნება. ისრაელში ვიზიტის დროს საქართველოს დელეგაციამ, პრემიერ-მინისტრის ხელმძღვანელობით, მონაწილეობას მიიღო კომისიის დამფუძნებელ მემორანდუმზე ხელმოწერის ცერემონიალში.
წარმატებული აღმოჩნდა პრემიერის შეხვედრა ებრაელ ბიზნესმენებთან, რომლებმაც საქართველოში ინვესტიციების განხორციელების სურვილი გამოთქვეს. შეხვედრაზე გადაწყდა ბიზნესმენების საქართველოში სტუმრობა მარტის თვეში.
ვიზიტის ფარგლებში ირაკლი ღარიბაშვილმა მოინახულა ჰოლოკოსტის მუზეუმი და გვირგვინით შეამკო იერუსალიმის მთაზე მდებარე ჰოლოკოსტის მსხვერპლთა მემორიალი - "იად ვაშემი-"ს, მანვე მონაწილეობა მიიღო იერუსალიმის ერების ხეივანში ხის დარგვის ცერემონიაში.
საქართველოს დელეგაციაში ასევე იმყოფებოდნენ: საგარეო საქმეთა მინისტრი მაია ფანჯიკიძე, ეკონომიკისა და მდგრადი განვითარების მინისტრი გიორგი კვირიკაშვილი, სოფლის მეურნეობის მინისტრი შალვა ფიფია, თანაინვესტირების ფონდის ხელმძღვანელი გიორგი ბაჩიაშვილი და საინვესტიციო სააგენტოს უფროსი გიორგი პერტაია.
