ცხინვალის ე.წ. ადმინისტრაციასა და იტალიის ქალაქ ლანუზეის შორის ეკონომიკურ-კულტურული თანამშრომლობის შესახებ შეთანხმება გაფორმდა. განცხადება ამის შესახებ ცხინვალში გამართულ ბრიფინგზე ე.წ. სამხრეთ ოსეთის ე.წ. საგარეო საქმეთა მინისტრის ე.წ. მოვალეობის შემსრულებელმა დავიდ სანაკოევმა გააკეთა.
მისი თქმით, შეთანხმება 13 იანვარს გაფორმდა. „დოკუმენტს ხელი ცხინვალის მერმა ალან ალბოროვმა და ლანუზეის მერმა დავიდ ფარელლიმ მოაწერეს", _ იუწყება ოსური მხარე.
„სამხრეთ ოსეთის საგარეო პოლიტიკური კურსის რეალიზაციისა და პრეზიდენტის მიერ რესპუბლიკის პარლამენტისა და ხალხისადმი მიმართ გაგზავნილი მიმართვის ფარგლებში იტალიაში სამხრეთ ოსეთის ოფიციალური დელეგაციის ვიზიტი განხორციელდა.
ვიზიტის დროს ჩვენ შევხვდით იტალიის პარლამენტისა და სენატის წევრებს, ასევე ამ ქვეყნის ავტორიტეტულ საზოგადოებრივ-პოლიტიკურ მოღვაწეებს.
ცხინვალის მერიასა და კუნძულ სარდინიაზე მდებარე ქალაქ ლანუზეას შორის ხელმოწერილია შეთანხმება კულტურულ-ეკონომიკური თანამშრომლობის შესახებ",_ განაცხადა დავიდ სანაკოევმა ცხინვალში.
მისივე თქმით, ოსი სეპარატისტები უახლოეს მომავალში იტალიელი საზოგადოებრივ-პოლიტილიტიკური მოღვაწეებისა და ბიზნესმენების ვიზიტს ელიან.
სანაკოევი ასევე აცხადებს, რომ შეთანხმების მომზადება რამდენიმე თვის განმავლობაში მიმდინარეობდა.
„გაწეულია დიდი სამუშაო სამხრეთ ოსეთის დადებითი იმიჯის შესაქმნელად, თან არა მხოლოდ იტალიაში არამედ ევროპის სხვა ქვეყნებში. ჯერ კიდევ მცირე ხნის წინ სამხრეთ ოსეთის შესახებ იტალიაში ძალიან ცოტა იცოდნენ და ან იცოდნენ მხოლოდ საქართველოს წარმომადგენლებისგან.
ახლა სიტუაცია შეიცვალა. დამყარებულია კონტაქტები იტალიის მრავალ საზოგადოებრივ-პოლიტიკურ მოღვაწესთან და ჩვენ ამ ქვეყნის პარლამენტში მიღებულნი ვართ", _ განაცხადა სანაკოევმა.
სეპარატისტები ასევე იუწყებიან, რომ ამ საქმიანობაში ე.წ. სამხრეთ ოსეთს დიდ დახმარებას უწევს საზოგადოებრივი ორგანიზაცია „სამხრეთ ოსეთის მეგობრები", ასევე რუსეთის საგარეო საქმეთა სამინისტრო და რუსული პოლირიკური გაერთიანებები.
პრესკონფერენციაზე სანაკოევმა ასევე განაცხადა, რომ რესპუბლიკა სან-მარინოსათვის სამხრეთ ოსეთისა და აფხაზეთის მიერ გაგზავნილი მიმართვა აღიარების შესახებ შესაბამისი ორგანოების მიერ განსახილველად მიღებულია, თუმცა პასუხი ჯერ არ არის.
