ყაზახეთის რესპუბლიკის სენატში, ყაზახეთსა და ყირგიზეთში საქართველოს საგანგებო და სრულუფლებიანი ელჩი ზურაბ პატარაძე ყაზახეთის რესპუბლიკის პარლამენტის სენატის თავმჯდომარეს კასიმ-ჟომარტ ტოკაევს შეხვდა.
შეხვედრა ქართული მხარის ინიციატივით გაიმართა, სადაც განიხილეს ორ ქვეყანას შორის არსებული პოლიტიკური, ეკონომიკური და კულტურული თანამშრომლობა და მათი კიდევ უფრო გაღრმავების გზები. მხარეებმა მიმოიხილეს ტურიზმის სფეროში არსებული მიღწევებიც, სტატისტიკის თანახმად ყაზახი ვიზიტორების რიცხვი საქართველოში 40%-ით გაიზარდა. საუბარი ასევე შეეხო ოკუპირებულ ტერიტორიებზე არსებულ ვითარებას. ელჩმა პარლამენტის სენატის თავმჯდომარეს ინფორმაცია მიაწოდა საოკუპაციო ხაზის მიმდებარე სოფლებში არსებულ ვითარებაზე - მავთულხლართებისა და ხელოვნური ბარიერების აღმართვის ფაქტებზე. შეხვედრისას ელჩმა სენატის თავჯდომარეს მადლობა გადაუხადა ყაზახეთის ურყევი პოზიციისთვის, საქართველოს სუვერენიტეტისა და ტერიტორიული მთლიანობის საკითხებში. ისაუბრეს რუსეთ-საქართველოს ურთიერთობის საკითხებზე, სოჭის ოლიმიადაზე და მასთან დაკავშირებული უსაფრთხოების საკითხებზე.
კასიმ - ჟომარტ ტოკაევმა ხაზი გაუსვა კავკასიის რეგიონში საქართველოს გეო-პოლიტიკურ მნიშვნელობას. მისი თქმით სხვადასხვა სფეროებში საქართველოსთან ორმხრივი ურთიერთობების კიდევ უფრო გაღრმავება ყაზახეთის რესპუბლიკისთვის პრიორიტეტულია. „იმედს გამოვთქვამ, რომ ორ სახელმწიფოს შორის არსებული პარტნიორული ურთიერთობები კიდევ უფრო გაძლიერდება" აღნიშნა კასიმ - ჟომარტ ტოკაევმა. მან თავის მხრივ ოფიციალურად მიიწვია ყაზახეთში საქართველოს პარლამენტის თავმჯდომარე დავით უსუფაშვილი.
საქარველოს ელჩმა სენატის თავჯდომარეს საქართველოს ხელისუფლების მიერ ბოლო პერიოდში განხორციელებული რეფორმები გააცნო.
