რამდენიმე დღეში "გუდვილის" ირგვლივ განვითარებული პროცესი გადამწყვეტ ფაზაში შევა და კრედიტორები რეაბილიტაციის მმართველს აირჩევენ. რეაბილიტაციის მმართველის უფლებამოსილებებს კრედიტორთა კრება განსაზღვრავს, სადაც, როგორც ცნობილია თიბისი ბანკის პოზიციას, როგორც მთავარი კრედიტორისას, გადამწყვეტი მნიშვნელობა მიენიჭება.
რეაბილიტაციის მმართველი კანონმდებლობით დამოუკიდებელი, ობიექტური ადამიანი უნდა იყოს, რომელიც დააბალანსებს სიტუაციას კომპანიასა და კრედიტორებს შორის.
თუმცა, როგორც "გუდვილში" აცხადებენ არჩეული მმართველისთვის გადამეტებული უფლებების მინიჭების საფრთხე მაინც არსებობს და თუ ეს გადაწყვეტილება სისრულეში მოვა, კომპანია "გუდვილი" ირიბად აღმოჩნდება "თიბისი ბანკის" მმართველობის ქვეშ, როგორც ეს 2013 წელს იყო, როცა განხორციელდა "გუდვილის" უძრავ-მოძრავი ქონების თიბისი ბანკის საკუთრებაში გადაცემა დაბალ ფასად და კრედიტორთა წინაშე ვალდებულებების დაგროვება.
„ვშიშობთ, რომ თუ რეაბილიტაციის მმართველს მიენიჭება "გუდვილის" მართვისა და წარმომადგენლობის უფლებამოსილება, კანონმდებლობის შესაბამისად კი მის საქმიანობაზე ზედამხედველობას ახორციელებენ კრედიტორები, სავარაუდოა, რომ ის განახორციელებს "თიბისი ბანკის", როგორც ყველაზე მსხვილი კრედიტორის ინტერესებს, რამაც შესაძლებელია საბოლოო ჯამში გამოიწვიოს "გუდვილის" გაკოტრება "თიბისი ბანკის" მიერ "გუდვილში" გოგი შევარდნაძის წილის დასაკუთრების მიზნით. აღსანიშნავია, რომ "თიბის ბანკმა" უკვე მიმართა სარჩელით სასამართლოს "გუდვილის" დამფუძნებლის გიორგი შევარდნაძის წინააღმდეგ და ყადაღა დაადო მის წილს შპს "გუდვილში"." -აცხადებენ "გუდვილში".