,,ფილიპ ლეფორისგან მკაფიო უარყოფა მისი განცხადების შესახებ ვერ მოვისმინეთ", _განაცხადა ჟურნალისტებთან საგარეო საქმეთა მინისტრის მოადგილემ დავით ზალკალიანმა სამხრეთ კავკასიის საკითხებში ევროკავშირის სპეციალური წარმომადგენლის ფილიპ ლეფორის განცხადებების საპასუხოდ.
ზალკალიანის განმარტებით, ევროკავშირის ხელმძღვანელობა ინფორმირებული იქნება ლეფორის განაცხადებასთან დაკავშირებით.
"ჩვენ მოვისმინეთ ლეფორის გუშინდელი განცხადება. გარდა ამისა, ვნახეთ ვიდეომასალა, რომელიც ასახავდა ცხინვალის წარმომადგენლებთან მის შეხვედრას და ყოველივე ამის შემდეგ შემიძლია განვაცხადო, რომ ბუნდოვანება კვლავ რჩება. მიუხედავად იმისა, რომ ფილიპ ლეფორმა დააფიქსირა ევროკავშირის პოზიცია, საქართველოს ტერიტორიული მთლიანობის მხარდაჭერის შესახებ, მკაფიო უარყოფა მისი განცხადების შესახებ მაინც ვერ მოვისმინეთ. აქედან გამომდინარე, ჩვენ ინსტრუქცია მივეცით საქართველოში ევროკავშირის ელჩს, რომ მან ევროკავშირის ხელმძღვანელობის დეტალური ინფორმირება მოახდინოს ლეფორის განცხადებასთან დაკავშირებით", - განაცხადა ზალკალიანმა.
მისივე თქმით, დღეს მას შეხვედრა ექნება საქართველოში ევროკავშირის ელჩთან ფილიპ დიმიტროვთან და თავად ფილიპ ლეფორთან და დეტალურ განმარტებას მოისმენს.
"მე მათ ძალიან კატეგორიულად მოვთხოვ, რომ გააკეთონ განცხადება იმასთან დაკავშირებით, თუ რამდენად ასახავს ევროკავშირის პოზიციას ფილიპ ლეფორის განცხადება და მართლა ხომ არ აქვს ადგილი ამ განცხადების ინტერპრეტაციას. ჩვენი მხრიდან გადადგმული იქნება ეს ნაბიჯები და დარწმუნებული ვართ, რომ ევროკავშირის მხრიდანაც იქნება ადეკვატური რეაქცია", - განაცხადა ზალკალიანმა.
,,სამხრეთ ოსეთის დამოუკიდებლობა რეალობაა, რომლის შეცვლა შეუძლებელია", _ეს განცხადება ჟენევის საერთაშორისო მოლაპარაკებათა ერთ ერთმა თანათავმჯდომარემ ფილიპ ლეფორმა (ევროკავშირი) ცხინვალში ყოფნისას, ოს სეპარატისტთა ლიდერთან ლეონიდ თიბილოვთან შეხვედრაზე გააკეთა. აღნიშნულ ინფორმაცია ოსურმა მედიამ გაავრცელა. მოგვიანებით კი ლეფორმა თავისი განცხადება განმარტა და აღნიშნა, რომ ,,საქართველოს ტერიტორიული მთლიანობის მიმართ ევროკავშირის მხარდაჭერა კიდევ ერთხელ დაადასტურა და განაცხადა, რომ არავინ უნდა „შეეცადოს" ამ პოზიციის „არასწორ ინტერპრეტაციას"
