ევროკავშირის სპეციალურმა წარმომადგენელმა სამხრეთ კავკასიის საკითხებში და ჟენევის დისკუსიების თანათავმჯდომარემ ფილიპ ლეფორმა საქართველოს ტერიტორიული მთლიანობის მიმართ ევროკავშირის მხარდაჭერა კიდევ ერთხელ დაადასტურა და განაცხადა, რომ არავინ უნდა „შეეცადოს" ამ პოზიციის „არასწორ ინტერპრეტაციას". ინფორმაციას ამის შესახებ პორტალი „Civil.ge" ავრცელებს.
მან ეს კომენტარი რუსული საინფორმაციო სააგენტოს „რეგნუმის" ინფორმაციის საპასუხოდ გააკეთა, რომელმაც დაწერა შემდეგი სახის ინფორმაცია გაავრცელა: „სამხრეთ ოსეთის როგორც დამოუკიდებელი სახელმწიფოს სტატუსი რესპუბლიკის მოსახლეობამ დიდი ხნის წინ განსაზღვრა და ამ პოზიციის შეცვლა ფაქტიურად შეუძლებელია. ამის თაობაზე ჟენევის დისკუსიების თანათავმჯდომარემ ევროკავშირიდან, ფილიპ ლეფორმა ცხინვალში განაცხადა". ანალოგიური ინფორმაცია გაავრცელა სეპარატისტული რეგიონის საინფორმაციო სააგენტომ „რეს"-მა მას შემდეგ, რაც ლეფორი 20 იანვარს ცხინვალში სეპარატისტული სამხრეთ ოსეთის ლიდერს ლეონიდ თიბილოვს შეხვდა.
„ევროკავშირის პოზიცია ემყარება საქართველოს ტერიტორიული მთლიანობის მხარდაჭერას საერთაშორისოდ აღიარებული საზღვრების ფარგლებში და ამაში არავის უნდა ეპარებოდეს ეჭვი და არც უნდა შეეცადონ მის არასწორად ინტერპრეტაციას", - განუცხადა ლეფორმა Civil.ge-ს ერევნიდან ტელეფონით 21 იანვარს.
ამ ინფორმაციის კომენტირებისას, ლეფორის განმარტებამდე, საქართველოს საგარეო საქმეთა მინისტრმა მაია ფანჯიკიძემ განაცხადა, რომ იგი შეეკითხება ევროკავშირის სპეციალურ წარმომადგენელს რამდენად შეესაბამება სიმართლეს მასზე დაყრდნობით რუსული და ოსური მედიით გავრცელებული განცხადება, როდესაც ის ლეფორს 22 იანვარს თბილისში შეხვდება.
საგარეო საქმეთა მინისტრის პირველმა მოადგილემ დავით ზალკალიანმა, რომელიც საქართველოს მთავარი მომლაპარაკებელია ჟენევის დისკუსიებზე, განაცხადა: „არასდროს მას [ლეფორს] საქართველოს საწინააღმდეგო განცხადება არ გაუკეთებია. იგი, როგორც თანათავმჯდომარე, იყო მიუკერძოებელი და ყოველთვის უძღვებოდა შესაბამისად ამ მოლაპარაკების პროცესს. ამიტომ, მე ძალიან გამიკვირდა და მინდა განვაცხადო, რომ არ მინდა დავიჯერო, რომ ეს არის სიმართლე".
