თბილისის მერიის მოვალეობის შემსრულებლის სევდია უგრეხელიძის მიერ სატელევიზიო ანძის განათების გამორთვასთან დაკავშირებით ვითარებაში გარკვევის მიზნით თბილისის საკრებულოს თავმჯდომარე, ირაკლი შიხიაშვილი საკრებულოში გუშინ შეხვდა შპს „სინათლის ქალაქი"-ს დირექტორს, ნიკოლოზ ტოგონიძეს. როგორც ,,ჯი-ეიჩ-ენს" საკრებულოდან აცნობეს მასთან გასაუბრების შედეგად დადასტურდა საკრებულოს წარმომადგენლების მიერ გაჟღერებული ინფორმაცია, რომ ანძის განათებასთან დაკავშირებით არ არსებობს ფინანსური პრობლემები და „სინათლის ქალაქის" ხელმძღვანელობამ უშუალოდ თბილისის მერიიდან მიიღო ანძის გამორთვის ზეპირი ბრძანება.
შესაბამისად, საკრებულოს თავმჯდომარის მიერ მიღებული იქნა გადაწყვეტილება, რომ სატელევიზიო ანძის განათება კვლავ აღდგენილიყო, რასაც თბილისის მერია აბსოლუტურად არ მოელოდა.
ირაკლი შიხიაშვილი საკრებულოს დეპუტატებთან ერთად მივიდა ადგილზე და მერიის ხელმძღვანელობის უკანონობა აღკვეთა და აიძულა გაენათებინათ ანძა.
ადგილზე მისულ ჟურნალისტებს ირაკლი შიხიაშვილმა განუცხადა, რომ ანძის განათების გამორთვა არის წმინდა წყლის საბოტაჟი და პოლიტიკური შანტაჟი, რაც მიმართულია თბილისელების წინააღმდეგ.
„თბილისის მერიის ყველა ქმედება მიმართულია იმისკენ, რომ თბილისელებს გაუჩინონ შეგრძნება, თითქოს ქალაქში ყველაფერი მიდის უარესობისკენ იმის გამო, რომ საკრებულომ ბიუჯეტი არ მიიღო. მინდა თბილისელებს ვუთხრა, რომ წლიური ბიუჯეტის 1/12 სრულიად საკმარისია იმისათვის, რომ ყველა სამსახურმა გამართულად იმუშავოს, ვიდრე ბიუჯეტი არ დამტკიცდება. „სინათლის ქალაქის" ხელმძღვანელიც ადასტურებს, რომ მას არ აქვს არანაირი ფინანსური პრობლემა და ანძის განათების გამორთვის ბრძანება უშუალოდ მერიის ხელმძღვანელობისგან მიიღო. თუ მერია მიმართავს საბოტაჟს და მისი რომელიმე სამსახურის უფროსი შეეცდება ქალაქში ფსიქოზის დანერგვას და შანტაჟით იხელმძღვანელებს, ამაზე კანონის სრული სიმკაცრით დაისჯებიან. ასე ავანთებთ, რასაც ჩააქრობენ და ასე ავაშენებთ, რასაც გააფუჭებენ. ჩვენ აუცილებლად დავუსვამთ წერტილს სექტად ქცეულ „ნაცმოძრაობას", დანარჩენი კი თბილისელებმა გადაწყვიტონ", - განაცხადა ირაკლი შიხიაშვილმა.
შგახსენებთ, რომ თბილისის მერის მოვალეობის შემსრულებლის სევდია უგრეხელიძის გადაწყევტილებით გუშინ სატრელევიზო ანძა გაითიშა.
,,როგორც ცნობილია ქალაქ თბილისის საკრებულოს ,,ქართული ოცნების" უმრავლესობამ ცოტა ხნის წინ არ დაამტკიცა ქალაქ თბილისის ბიუჯეტი. ამის მიზეზი ყურით მოთრეული მიზეზები იყო. მათ შორი, მაგალითად, თბილისის ტელეანძის Gგანათება. ჩვენი აზრით, ამით მათ სურდათ პრობლემები შეექმნათ თბილისის მერიისთვის, სინამდვილეში პრობლემები შეექმნა თბილისის მოსახლეობას, რადგან ბიუჯეტის დაუმტკიცებლობით შეიძლება შეჩერდეს ისეთი პროექტები, როგორიცაა ჯანდაცვის, ოპერაციების, მათ შორის ბაღების, ხიდების შეკეთების დასუფთავების დაფინანსება. იმისთვის, რომ ცხადი გახდეს, რომ მზად ვართ გადავდგათ შემხვედრი ნაბიჯი, გადავწყვიტეთ გამოვრთოთ ტელეანძა და იქამდე სანამ ბიუჯეტი არ დამტკიცდება თანხა წარმართული არ იქნება ტელეანძის შესაკეთებლად და გასანათებლად", _განაცხადა სევდია უგრეხელიძემ
