,,საერთაშორისო გამჭვირვალობა-საქართველოს" თავმჯდომარის აღმასრულებელი დირექტორის ეკა გიგაურის განმარტებით, მთავარი პროკურორის შერჩევის პროცესში კანონის მოთხოვნები არ სრულდება. როგორც საკითხის კომენტირებისას გიგაურმა განაცხადა მთავარი პროკურორის შერჩევისას ყველაზე დიდი პასუხისმგებლობა იუსტიციის მინისტრს ეკისრება, თუმცა ის აღნიშნულ საკითხის გადაწყვეტაში არ ერევა.
,,სამწუხაროა, რომ არ სრულდება კანონის მოთხოვნები, როდესაც საუბარია მთავარი პროკურორის შერჩევის პროცესზე. "პროკურატურის შესახებ" კანონის მე-9 მუხლი საუბრობს ერთის მხრივ, მთავარი პროკურორის პასუხისმგებლობაზე, მეორეს მხრივ კი მისი შერჩევის წესზე. აქ ყველაზე მთავარი როლი საქართველოს იუსტიციის მინისტრს ეკისრება. სამწუხაროა, რომ იუსტიციის მინისტრი ამ კონსულტაციებში, რომელიც მთავარი პროკურორის შერჩევასთანაა დაკავშირებული, ჩართული არ არის. იგი საუბრობს იმაზე, რომ შერჩევა ხდება საქართველოს პრემიერ-მინისტრის მიერ, რაც ჩვენთვის მიუღებელია, რადგანაც საქართველოს იუსტიციის მინისტრმა, ვფიქრობთ, რომ უნდა აიღოს პასუხისმგებლობა იმ ადამიანზე, რომელიც საბოლოოდ ამ თანამდებობაზე დაინიშნება. კანონი საუბრობს იმაზე, რომ მთავარ პროკურორს იუსტიციის მინისტრის წარდგინებით პრემიერ-მინისტრი ნიშნავს, შესაბამისად, მან უნდა იცოდეს, თუ ვინ იქნება ეს პიროვნება", - განაცხადა გიგაურმა.
