აშშ-ს მთავრობამ უკრაინის პრეზიდენტის ვიქტორ იანუკოვიჩის ახლობლების სია შეადგინა, რომლების მიმართაც პერსონალური სანქციების დაწესებას აპირებს. ინფორმაცია ამის შესახებ, აშშ-ს სახელმწიფო დეპარტამენტში არსებულმა „ამერიკის ხმის" წყარომ დაადასტურა.
მათივე ინფორმაციით, სახელები იმ ადამიანებისა, რომელთა მიმართაც ეს სანქციებია დაწესებული არ განსაჯაროვდება.
შეგახსენებთ, რომ 7 იანვარს აშშ-ს სენატმა უკრაინელი ხალხის მხარდამჭრი რეზოლუცია მიიღო, რომელშიც დაგმო უკრაინის ხელისუფლების მიერ მშვიდობიანი დემონსტრანტების მიმართ ძალის გამოყენება. სენატმა ასევე განაცხადა, რომ „მშვიდობიანი დემონსტრანტების მიმართ სახელმწიფო ძალადობის მომავალში გაგრძელების შემთხვევაში პრეზიდენტმა და კონგრესმა უნდა გადაწყვიტონ სანქციების გამოყენების მიზანშეწონილობა იმ პირების მიმართ რომლებიც პასუხისმგებელნი არიან ძალადობის შესახებ ბრძანებების გაცემაში".
15 იანვარს კი აშშ-ს სენატის საერთაშორისო საქმეთა კომიტეტმა კვლავ უკრაინაში არსებული მდგომარეობა განიხილა. მასზე აშშ სახელმწიფო მდივნის თანაშემწემ ვიქტორია ნულანდმა განაცხადა, რომ აშშ-ს მთავრობა ღონისძიებათა სპექტრის განხორციელებას განიხილავს იმ შემთხვევაში თუ უკრაინის ხელისუფლება საკუთარი მოქალაქეების მიმართ კვლავ ძალას გამოიყენებს.
