საქართველო რუსეთის მიერ ოკუპირებულ თავის რეგიონებთან თავდაუსხმელობის ხელშეკრულების გაფორმებაზე მხოლოდ მაშინ იფიქრებს, როდესაც რუსული ჯარი ამ ტერიტორიებს დატოვებს. განცხადება ამის შესახებ „ბი-ბი-სი"-სათვის მიცემულ ინტერვიუში შერიგებისა და სამოქალაქო თანასწორობის მინისტრმა პაატა ზაქარეიშვილმა გააკეთა.
„ყველასათვის ხომ გასაგებია, რომ საქართველო არ აპირებს ძალის გამოყენებას. რომც უნდოდეს მაინც, იქ ხომ რუსეთის ჯარი დგას.
როდესაც ისინი დატოვებენ ამ ტერიტორიებს, მაშინ შესაძლებელი იქნება ამ შეთანხმების გაფორმება. მანამდე კი სხვა საკითხები უნდა განვიხილოთ, სხვა პრობლემები, რომლებიც დაგროვდა და რომლებიც ძალიან ბევრია - ადამიანთა გადაადგილების პრობლემა, გარესამყაროსთან ურთიერთობა, ვაჭრობა და მრავალი სხვა.
ისინი უბრალოდ დროს წელავენ ეს კი ძალიან საზიანოა კონფლიქტების მოწესრიგებისათვის, იმიტომ, რომ თი ასე გაგრძელდა, მაშინ საქართველოს მოსახლეობა და მთელი მსოფლიო იფიქრებს, რომ აფხაზებსა და ოსებს მშვიდობა და მშვიდობიანი პროექტები არ სურთ. და ეს თუ ასეა მაშინ რატომ ვხარჯავთ ძალებს? მათ უნდა ისარგებლონ მომენტით", _ აცხადებს ზაქარეიშვილი.
