საქართველოს პრემიერ-მინისტრმა ირაკლი ღარიბაშვილმა საახალწლო მიღებაზე შეკრებილ საზოგადოებას სიტყვით მიმართა.
პრემიერის მიმართვას „ჯი-ეიჩ-ენი" უცვლელად გთავაზობთ.
მოგესალმებით ყველას!
დიდი მადლობა მინდა მოგახსენოთ მობრძანებისთვის. ჩემთვის დიდი პატივია თქვენთან შეხვედრა, რადგან თქვენ ბრძანდებით ჩვენი საზოგადოების ის ნაწილი, რომელიც მნიშვნელოვან გავლენას ახდენს ჩვენი ქვეყნის საზოგადოებრივ ცხოვრებაზე. თქვენ, თქვენი საქმიანობით, ეხმარებით ხალხსა და ხელისუფლებას ქვეყნის სწორი მიმართულებით წაყვანის საქმეში. სწორედ ამიტომ, მინდა თქვენთან ერთად, ერთგვარად, მოკლედ შევაჯამო 2013 წელი და 2014 წლის გამოწვევებზეც გაგიზიაროთ ჩემი აზრი.
გასულ წელი მართლაც ძალიან მნიშვნელოვანი იყო ჩვენი ქვეყნისთვის. ეს წელი იყო სავსე მნიშვნელოვანი მოვლენებითა და ემოციებით. ეს იყო რთული, მაგრამ ამავე დროს ერთგვარად გარდამტეხი წელი.
პირველ რიგში, უნდა აღვნიშნო, რომ ჩვენ ჩავატარეთ ნამდვილად დემოკრატიული და თავისუფალი საპრეზიდენტო არჩევნები. პირველად მოხდა ისე, რომ არჩევნების სამართლიანობაში ეჭვი ვერ შეიტანა ვერავინ, ვერც ჩვენთან და ვერც საზღვარგარეთ. ყველას მოგეხსენებათ, როგორი შეფასება მოჰყვა ამ არჩევნებს ჩვენი დასავლელი მეგობრებისა და პარტნიორების მხრიდანაც. ამ არჩევნებით ჩვენ კიდევ ერთი ნაბიჯი გადავდგით დემოკრატიის გზაზე.
2013 წელს ჩვენ მოვახდინეთ ასოცირების შესახებ ხელშეკრულების პარაფირება, რაც ძალიან მნიშვნელოვანი ნაბიჯია ევროპასთან დაახლოების გზაზე.
ერთი წელი არც თუ ისე დიდი დროა, მაგრამ ქვეყანაში დაიწყო ყველაზე მთავარი - სამართლიანობის დამკვიდრების პროცესი და ეს პროცესი ყველას თვალწინ მიმდინარეობს. დასრულდა შიშისა და ტერორის ეპოქა. ათასობით ადამიანი წინა ხელისუფლების პირობებში უსამართლოდ და გაუსაძლის პირობებში იმყოფებოდა პატიმრობაში, წელს კი საკუთარ სახლში შეხვდება ახალ წელს. ვიცი, რომ კიდევ რჩებიან ადამიანები, რომლებიც სამართლის აღსრულებას ელოდებიან. სამართლიანობის დამკვიდრება ხანგრძლივი და რთული პროცესია, ეს არსად მომხდარა ერთ დღეში და ვერც ჩვენთან მოხდება. მთავარია ეს პროცესი მიმდინარეობდეს კანონის სრული დაცვით და ისე, რომ მის სამართლიანობაში ეჭვის შეტანა ძნელი იყოს.
ჩვენი პოლიტიკური გუნდის მთავარი მიზანი კანონის უზენაესობის დამკვიდრებაა და არა პოლიტიკური ანგარიშსწორება, და ჩვენ მაქსიმალურად ვიცავთ ამ პრინციპს. შეიძლება ამ გზაზე რაღაც ხარვეზები არსებობს, მაგრამ მთავრობა, საზოგადოების ფართო ჩართულობითა და თითოეული თქვენგანის ხელშეწყობით, მჯერა, ღირსეულად გაივლის ამ ურთულეს პერიოდს და არავითარ შემთხვევაში არ დაუშვებს შერჩევით სამართალს.
ჩვენმა ხელისუფლებამ ადამიანი გამოაცხადა მთავარ ღირებულებად. პირველი ნაბიჯები გადაიდგა სოციალურად სამართლიანი სახელმწიფოს ჩამოყალიბებისაკენ. პირველ რიგში, ჩვენ ვიზრუნეთ სოციალურად ყველაზე დაუცველ ჩვენს თანამოქალაქეებზე და გავაორმაგეთ მათი დახმარება, ჯანდაცვა ხელმისაწვდომი გახდა ყველასთვის. ამ პრინციპით დავგეგმეთ 2014 წლის ბიუჯეტიც და იგი მთლიანად ორიენტირებულია ხალხზე.
ჩვენ ძალისხმევას არ ვიშურებთ ჩვენი ხალხის უკეთესი ცხოვრებისთვის. დარწმუნებული ვარ, თანამიმდევრული და სწორი ნაბიჯებით, ჩვენ ყველა ერთად მივაღწევთ ამას.
ახლა იწყება უფრო რთული, მაგრამ ამავე დროს ძალიან საინტერესო და ხანგრძლივი ეტაპი ჩვენი ქვეყნის დემოკრატიისა და აღმშენებლობის გზით განვითარების.
ძვირფასო მეგობრებო,
2014 წელი ჩვენი ქვეყნისთვის უმნიშვნელოვანესი წელი იქნება ევროპასთან დაახლოების კუთხით. ჩვენმა ევროპელმა მეგობრებმა უკვე განაცხადეს, რომ საქართველოს ევროკავშირთან ასოცირებისხელშეკრულებისგაფორმებისბოლოთარიღი2014 წლის აგვისტოიქნება.
მომავალ წელს ეს იქნება უდიდესი მიღწევა და, ამავე დროს, უმთავრესი გამოწვევა როგორც ხელისუფლებისათვის, ისე მთლიანად საზოგადოებისათვის. სწორედ ამიტომ გვმართებს კეთილგონიერება და პასუხისმგებლობა, რათა მივაღწიოთ დასახულ ამოცანას, მინიმუმამდე დავიყვანოთ ყველა ის დაბრკოლება, რომლებიც შეიძლება შეგვექმნას ევროპეიზაციის გზაზე.
ევროკავშირში ინტეგრაციით ჩვენ გვაქვს უნიკალური შესაძლებლობა, საქართველო ერთხელ და სამუდამოდ ჩამოყალიბდეს ევროპულ ქვეყნად. ეს არის ჩვენი ხალხის მტკიცე ნება. ეს არის ჩვენი ისტორიული არჩევანი, რომელსაც ალტერნატივა არა აქვს.
ევროკავშირი, ევროპის სივრცე - ეს იქნება სრულიად ახალი შესაძლებლობები საქართველოსთვის, ჩვენი ქვეყნის მოქალაქეებისთვის.
ევროპული არჩევანი ჩვენი დიდი პასუხისმგებლობაა, რადგან ევროპის სივრცეში ცხოვრება, პირველ რიგში, თავისუფლებაში ცხოვრებას ნიშნავს. ეს ნიშნავს ძლიერ სამოქალაქო საზოგადოებას, თავისუფალ მედიას, თავისუფალ სასამართლოს, ძლიერ ეკონომიკას, ეს ნიშნავს სამართლიან კანონებს და კანონმორჩილ მოქალაქეებს, ბოლოს და ბოლოს, ეს ნიშნავს მოქალაქეობრივ პასუხისმგებლობას. ჩვენ მხოლოდ ასეთი პასუხისმგებლობით მოპოვებული კეთილდღეობა გვჭირდება, მხოლოდ ასეთი პასუხისმგებლობით მიღწეული სტაბილური ცხოვრება გვჭირდება. აი, ასეთი ცხოვრება, ასეთი კეთილდღეობა იქნება ნამდვილი და არა მოჩვენებითი.
საქართველო უნდა გახდეს ეკონომიურად ძლიერი და საინტერესო ქვეყანა. უნდა შეიქმნას სასურველი საინვესტიციო გარემო. სამოქალაქო საზოგადოების გაძლიერება კი გარანატი უნდა გახდეს იმისა, რომ საქართველო აღარასოდეს დაუბრუნდება ძალადობის ეპოქას. ერთად დგომით და ერთმანეთის მხარდაჭერით ჩვენ შევძლებთ ყველაფერს!
ჩვენ ყველამ ერთად, ხელისუფლებამ და საზოგადოებამ უნდა შევძლოთ კონსტრუქციული კრიტიკისა და თანამშრომლობის ფორმატში ისეთი ქვეყნის ჩამოყალიბება, რომელიც ღირსეულ ადგილს დაიჭერს თანამედროვე, საერთაშრისო თანამეგობრობის წევრ ქვეყნებს შორის.
ჩვენ ყველამ ერთად უნდა ვიზრუნოთ თითოეული ჩვენგანის და მთლიანად ქვეყნის კეთილდღეობაზე.
მომავლის იმედით და საუკეთესო სურვილებით, კიდევ ერთხელ გილოცავთ დამდეგ ახალ წელს. გილოცავთ და მჯერა, რომ 2014 წელი საქართველოსთვის მშვიდობისა და წინსვლის წელიწადი იქნება!
გმადლობთ ყურადღებისათვის.
