ახალი ამბების სააგენტო ,,ჯი-ეიჩ-ენის" მიერ გამოქვეყნებულ, აფხაზეთის ა/რ თავმჯდომარის მოვალეობის შემსრულებლის ვახტანგ ყოლბაიას ინტერვიუს (ვახტანგ ყოლბაია ჟენევაში მიმდინარე მოლაპარაკებებზე და აფხაზეთის მთავრობის მიერ დადგეგმილ რეფორმაზე საუბრობს http://ghn.ge/news-100521.html ), აფხაზეთის ავტონომიური რესპუბლიკის სამთავრობო სტრუქტურების თანამშრომლების ერთი ჯგუფის გამოხმაურება მოჰყვა. მათ საკუთარი პოზიციის გამოქვეყნების მოთხოვნით მოგვმართეს.
ტექსტს, რომლის გამოქვეყნებაც მათ მოითხოვეს უცვლელად, ყოველგვარი რედაქტირების გარეშე გთავაზობთ:
აფხაზეთის ავტონომიური რესპუბლიკის სამთავრობო სტრუქტურებიდან გათავისუფლებულ და ჯერ-ჯერობით დასაქმებულ თანამშრომლებს გვსურს ჩვენი პოზიცია დავაფიქსიროთ აფხაზეთის ა/რ თავმჯდომარის მოვალეობის შემსრულებლის ბატონ ვახტანგ ყოლბაიას მიერ ახალი ამბების სააგენტო ,,ჯი-ეიჩ-ენი"-სთვის მიცემულ ინტერვიუზე, სადაც ის ასევე შეეხო აფხაზეთის ა/რ მთავრობაში მიმდინარე ცალკეული უწყებების ლიკვიდაციისა და თანამშრომლების გათავისუფლების საკითხს.
იმთავითვე უნდა აღინიშროს, რომ ნამდვილად არ შეესაბამება სიმართლეს ვ.ყოლბაიას სიტყვები ,,ჯერ არავინ გათავისუფლებულა". დღეისათვის უკვე, სრულიად უსაფუძვლოდ, პერსონალური შეხედულებისამებრ 25-მდე თანამშრომლის გათავისუფლება მოასწარით, 150 თანამშრომელს ამყოფებთ ლიკვიდაციის რეჟიმში და თუ ეს განუკითხაობა საქართველოს ახალმა ხელისუფლებამ და აფხაზეთის უმაღლესმა საბჭომ დროზე არ შეაჩერა, იგივე ბედს გაიზიარებს დანარჩენი 300 თანამშრომელი. საზოგადოებას შესაძლოა ობიექტურად გაუჩდეს კითხვა _ რა შეიძლება იყოს თანამშრომლების ასეთი მასობრივი დათხოვნის მიზეზი? ბატონი ვახტანგ ყოლბაია ამის მიზეზად რეფორმებისა და ობტიმიზაციის აუცილებლობას ასახელებს, რაც ნამდვილად მისასალმებელია და უდაოდ ვემხრობით კიდეც ამ პროცესს. თუმცა როგორც ეს ხშირად ხდება ხოლმა ეშმაკი დეტალებშია და სად ეშმაკობს ბატონი ვახტანგი? მოგახსენებთ ფაქტებით. აფხაზეთის ა/რ ჯანდაცვის სამინისტროში დასრულებული ვ.ყოლბაიას ე.წ რეფორმა-ოპტიმიზაციის პროცესის შედეგად გათავისუფლდა თანამშრომლების მეოთხედი, ხოლო 30 შტატიან სამსახურში დამტკიცდა 19 ხელმძღვანელი თანამდებობა მათ შორის 4 მინისტრის მოადგილე, როგორც იტყვიან ფაქტი ჯიუტია და თავად მეტყველებს ყველაფერზე. ბატონო ვახტანგ ასეთი რეფორმა დაგიკვეთათ საზოგადოებამ?! ესაა ობტიმიზაცია?! ნამდვილად არა, რადგანაც ის რასაც თქვენ ჩადიხართ არის ანტირეფორმა და აფხაზეთის ა/რ მთავრობისა და დევნილების სახელის გატეხვა.
ბატონო ვახტანგ, თქვენ საუბრობთ წარმატებულ წამოწყებებზე, თუმცა არცერთს არ ასახელებთ, ალბათ სიმრავლის გამო, არ გსურთ მკითხველი დეტალებით გადატვირთოთ _ ესეც თქვენი მორიგი სიცრუე. სიმართლე პატივცემულო საზოგადოებავ შემდეგია- ბატონო ვახტანგ, სწორედ თქვენ შეაჩერეთ აფხაზეთის ა/რ ჯანდაცვის სამინისტროს ხელმძღვანელის ბატონი გ. გადელიას მიერ დაწყებული მართლაც მეგა პროექტი რომლის შედეგადაც შესაძლებელი იყო რამოდენიმე სამედიცინო დაწესებულების მოდერნიზაცია, სამედიცინო აპარატურით სრულად აღჭურვა, კადრების მომზადება და 17-მდე სამედიცინო ცენტრში რამოდენიმე ასეული დევნილის დასაქმება და დევნილთა სამედიცინო მომსახურების დონის მნიშვნელოვანი გაუმჯობესება. აი ესაა რეფორმა და პროგრესი - რაც თქვენ შეაჩერეთ.
ინტერვიუში აღნიშნავთ, რომ ღია ხართ პრობლემებზე სასაუბროთ, მაგრამ ეს რომ ასე ყოფილიყო ღამის 3 საათზე, გაუსაძლის ყინვაში, აეროპორტში (სადაც თქვენი პრეს-სამსახურის ხელმძღვანელი იმყოფებოდა და შესაბამისად მშვენივრად იყავით ინფორმირებული ყოველივეს შესახებ) თქვენთან შესახვედრად მოსულ თანამშრომლებს, ჟენევაში მიმავალი სამთავრობო დელეგაციის რიგებიდან, რბილად რომ ვთქვათ არ აარიდებდით თავს. შეხვედრებისა და პრობლემებზე ღია საუბრისათვის მზად ვართ ჩვენ, ისინი ვინც ყოველგვარი საფუძვლის, ვიღაცის სიმპატია-ანტიპატიის მიხედვით, საახალწლოდ გაგვათავისუფლეს სამსახურიდან, ამიტომაც გთავაზობთ ღია ეთერში შეხვედრას და საზოგადოებამ თავად განსაჯოს თქვენი საქმიანობის შესახებ.
წერილის ავტორები:
აფხაზეთის ა/რ შრომის, ჯანმრთელობისა და სოციალური დაცვის სამინსიტროდან გათავისუფელბული თანამშრომლები : თამარ მარშავა, მერაბ ქირია, ლალი ომანაძე, ლალი ბერაია, ვახტანგ ჯანჯღავა, ალექსანდრე ლომია,
ასევე ლიკვიდაციაში მყოფი განსაკუთრებულ დავალებათა საკიხთებში აფხაზეთის მინისტრის აპარატის თანამშრომლები: დავით ზაქარაია, კრისტინა მაღაფერიძე, მადონა საჯაია, ლია მეტრეველი, გიორგი თოდუა, ირინე ჯღამაძე.
