ბრალდებულებისთვის 2014 წლის 1-ელი იანვრიდან მისანიჭებელი უფლებები 2016 წლის 1-ელ იანვრამდე აღარ ამოქმედება. კერძოდ პარლამენტის წევრის, თამაზ ავდალიანის „პატიმრობის კოდექსში ცვლილების შეტანის შესახებ" საკანონმდებლო ინიციატივის მიხედვით, ბრალდებულს 2014 წლის 1 იანვრის ნაცვლად, 2016 წლის 1 იანვრიდან ეძლევა უფლება ისარგებლოს 1 თვის განმავლობაში არაუმეტეს 4 ხანმოკლე პაემნის უფლებით, აგრეთვე საკუთარი ხარჯით მიმოწერისა და სატელეფონო საუბრის უფლებით პროკურორის ან გამომძიებლის ნებართვის საფუძველზე.
როგორც პლენარულ სხდომაზე აღინიშნა, ბრალდებულისათვის პატიმრობის შეფარდებისას ერთ-ერთი მნიშვნელოვანი კომპონენტია ბრალდებულის იზოლაცია, რათა მას არ მიეცეს შესაბამისი კონტროლის გარეშე პირებთან კონტაქტის საშუალება და ბრალდებულმა არ ჩაიდინოს ახალი დანაშაული, ხელი არ შეუშალოს საგამოძიებო პროცესს, არ მოახდინოს ზეწოლა არსებულ თუ პოტენციურ მოწმეებზე.
პროექტის თანახმად, პატიმრობაში მყოფი ბრალდებულის კონტაქტი გარე სამყაროსთან, აუცილებლობის შემთხვევაში, უნდა განხორციელდეს მხოლოდ საამისოდ უფლებამოსილი პირის თანხმობით.
„კანონის ამოქმედება, რომელიც 2014 წლის 1 იანვრიდან უნდა განხორციელებულიყო 2016 წლის 1 იანვრამდე ვეღარ მოხდება. ეს არის ადამიანის უფლებათა დაცვის კუთხით უკან გადადგმული ნაბიჯი. პოლიტიკურ გადაწყვეტილებას, რომელიც მიმართულია ,,ნაციონალური მოძრაობის" მაღალჩინოსნების გარე სამყაროსთან მაქსიმალურად შეზღუდვისკენ ჩვენ მხარს არ დავუჭერთ", - განაცხადეს საპარლამენტო უმცირესობის წარმომადგენლებმა.
