„ჩვენ გვინდა, რომ შენობები, რომელიც აშენდება საქართველოში იყოს უსაფრთხო და ამისათვის, გვინდა რომ დავარეგულიროთ სამშენებლო საქმიანობა", - აცხადებს ეკონომიკისა და მდგრადი განვითარების მინისტრი, რომელიც განმარტავს, რომ სამშენებლო სფეროს მოწესრიგების მიმართულებით მნიშვნელოვანი ნაბიჯები იდგმევა.
„ჩვენი მიზანია დარეგულირდეს საქართველოს სივრცითი მოწყობის საკითხები, და შემუშავდეს საქართველოს ქალაქებისა და რეგიონების განვითარების გეგმები, ისე რომ გათვალისწინებული იქნეს ყველა დაინტერესებული მხარის მოსაზრებები და ამასთან, შეიქმნას სტაბილური გარემო დეველოპერული საქმიანობისთვის. ამასთან, ჩვენ გვინდა, რომ შენობები, რომელიც აშენდება საქართველოში იყოს უსაფრთხო და ამისათვის, გვინდა რომ დავარეგულიროთ სამშენებლო საქმიანობა.
ამ მიზნით, ჩვენ პრაქტიკულად, უკვე დავასრულეთ მუშაობა „სივრცითი დაგეგმარებისა და სამშენებლო საქმიანობის კოდექსის" პროექტზე. კანონპროექტის მომზადებაში ჩართული იყო როგორც ადგილობრივი, ასევე საერთაშორისო დარგის ექსპერტები და იურისტები.
გაიმართა რამოდენიმე სამუშაო შეხვედრა პროფესიულ საზოგადოებასა და დაინტერესებულ მხარეებთან. მისი განხილვა პარლამენტის საგაზაფხულო სესიაზე იგეგმება.
ასევე მიმდინარეობს მუშაობა საქართველოს სამშენებლო-ტექნიკური რეგლამენტების დამუშავების მიმართულებითაც. ჩვენ გვინდა, რომ საქართველოში ეტაპობრივად დავნერგოთ ევროპული და საერთაშორისო მშენებლობის ნორმები"- განაცხადა კვირიკაშვილმა.
