,,ნაციონალური მოძრაობის" წევრი ირმა ნადირაშვილი სასჯელაღსრულების პრობაციისა და იურიდიული დახმარების საკითხთა მინისტრის სოზარ სუბარის დღეს გაკეთებულ განცხადებას ეხმიანება. როგორც ნადირაშვილმა განმარტა სოზარ სუბარის განცხადებამ დაადასტურა, რომ ვანო მერაბიშვილი საპატიმროდან ნამდვილად გაიყვანეს.
,,ხელისუფლების დღევანდელმა განცხადებებმა, კონკრეტულად, სოზარ სუბარის ბოლო განცხადებამ დაადასტურა, რომ ვანო მერაბიშვილი ნამდვილად გაიყვანეს საპატიმროდან და ადგილი ჰქონდა მთავარი პროკურორის მხრიდან მასზე შანტაჟსა და ზეწოლას", _განაცხადა ნადირაშვილმა.
მისივე განმარტებით, აუცილებელია ხელისუფლებამ დაიწყოს გამოძიება ყოფილი პრემიერის ვანო მერაბიშვილის მიერ გაკეთებულ განცხადებაზე.
,,კიდევ ერთხელ მოვითხოვთ, სასწრაფოდ დაიწყოს გამოძიება. გასაჯაროვდეს სათვალთვალო კამერების გრძელვადიანი ჩანაწერები, შეიქმნას საპარლამენტო კომისია ამ ორგანიზებული დანაშაულის გამოსაძიებლად", _განაცხადა ნადირაშვილმა.
შეგახსენებთ, რომ სასჯელაღსრულების სამინისტრო ვანო მერაბიშვილის განცხადებაზე გამოძიებას არ დაიწყებს. ამის შესახებ, სასჯელაღსრულების პრობაციისა და იურიდიული დახმარების საკითხთა მინისტრმა სოზარ სუბარმა განაცხადა. როგორც თემის კომენტირებისას სუბარმა განმარტა ყოფილი პრემიერი მერაბიშვილი ციხიდან არ გაუყვანიათ.
სუბარის განმარტებით, არავინ აპირებს მერაბიშვილზე ზეწოლას და არც მისთვის პირობების გაუარესებას.
,,მერაბიშვილი შაბათ-კვირას დაწესებულებიდან გაყვანილი არ ყოფილა. ეს ფაქტი რომ მომხდარიყო, ის იმ დღესვე გააკეთებდა განცხადებას. სასაცილოა, როცა ის ამბობს, რომ მას თავზე რაღაც ააფარეს და შემდეგ კი ვიღაცას ესაუბრა. გამოძიება ამ საკითხთან დაკავშირებით არ იწყება. თუ კი დაიწყება გამოძიება, მხოლოდ ამ შემთხვევაში მოხდება კადრების ამოღება. მე სრულიად ვეთანხმები პროკურატურის აზრს იმასთან დაკავშირებით, რომ აღნიშნულ საკითხზე გამოძიება არ დაიწყოს", _განაცხადა სუბარმა.
