,,მთავრობამ უკვე იზრუნა კვალის დაფარვაზე და კადრები უკვე წაშლილია", _განაცხადა ,,ნაციონალური მოძრაობის" წევრმა ირმა ნადირაშვილმა ყოფილი პრემიერის ვანო მერაბიშვილის გუშინ გაკეთებული განცხადების შემდეგ ხელისუფლების რეაგირების შეფასებისას.
,,არსებული სურათით იკვეთება, რომ ხელისუფლება დაადგა დანაშაულის ჯგუფური დაფარვის გზას. ჩვენ გვაქვს ინფორმაცია, რომ მთავრობამ უკვე იზრუნა კვალის დაფარვაზე და კადრები უკვე წაშლილია. დროის გაჭიანურება კი, ახლა სჭირდებათ იმისთვის, რომ სცადონ ფირების ფაბრიკაცია. ეს რომ ასე არ იყოს, გამოძიებაც უკვე დაწყებული იქნებოდა და კადრებიც გასაჯაროებული", _განაცხადა ნადირაშვილმა და აღნიშნა, რომ მთავარ ოპოზიციურ პარტიაზე შეტევის ახალი ტალღა დაიწყო.
,,ხელისუფლების მიერ გადადგმული ნაბიჯები ადასტურებს, რომ დაიწყო მთავარ ოპოზიციურ პარტიაზე შეტევის ახალი ტალღა. "ქართულ ოცნებას" ეშინია ჯანსაღი პოლიტიკური კონკურენციის. ამიტომ სჭირდებათ ციხეში დარჩეს პარტიის გენერალური მდივანი, გაგრძელდეს პოლიტიკური დევნა ოპოზიციის სხვა ლიდერებზე, დაკითხვებზე ატარონ უამრავი ადამიანი და ახალი გამოძიება ხელისუფლების მთავარ კონკურენტზე თბილისის თვითმმართველობის არჩევნებზე, გიგი უგულავაზე", _განაცხადა ნადირაშვილმა.
