,,ჩემს წინააღმდეგ წაყენებული ყველა შეთითხნილი ბრალდება ადრე თუ გვიან საპნის ბუშტივით გასკდება", _განაცხადა ჟურნალისტებთან თბილისის მერმა გიგი უგულავამ პროკურატურის დატოვების შემდეგ.
,,ადგილობრივი არჩევნები მოდის და უჭირს მთავრობას იმიტომ, რომ ივანიშვილმა არაადეკვატური და უსუსური კანდიდატი დაუტოვა. ახლა სისტემა ფიქრობს, როგორ შეასაღოს ეს კანდიდატი თბილისელებს. ამისთვის აუცილებელია, ყველა სხვა კანდიდატის ჩამოშორება და ბუტაფორიული კანდიდატების შექმნა. დღევანდელი დღე მხოლოდ და მხოლოდ ამას ემსახურება. მინდა, მათ გასაგონად ვთქვა, ვინც ეს გადაწყვეტილება მიიღო, რუსთავის კი არა, მესტიის სასამართლოში ვივლი და იქაც დავამტკიცებ, რომ ვარ უდანაშაულო და შესაბამისად, ჩემს წინააღმდეგ წაყენებული ყველა შეთითხნილი ბრალდება ადრე თუ გვიან საპნის ბუშტივით გასკდება. ამ ყველაფერს აქვს მხოლოდ პოლიტიკური ხასიათი, რომ წინასაარჩევნოდ ჩვენ არ ვილაპარაკოთ პრობლემებზე, რომლებიც ამ მთავრობამ ქვეყანას მოუტანა, არამედ ვიაროთ სასამართლოებში და ვამტკიცოთ, რომ სირაქლემები არ ვართ. ეს ყველაფერი დამთავრდება ადგილობრივი არჩევნებით და არჩევნებში მათი სრული კრახით და ამ ყველაფერს ფარდა აეხდება", - განაცხადა უგულავამ.
