საქართველოს პრემიერ-მინისტრი ირაკლი ღარიბაშვილი ყოფილი პრემიერ-მინისტრის ვანო მერაბიშვილის განცხადებას უკვე მეორედ გამოეხმაურა და მას პრიმიტიული პროვოკაცია უწოდა. როგორც საკითხის კომენტირებისას ღარიბაშვილმა განმარტა მთავარობას არ აქვს იმის კომფორტი, მერაბიშვილის თუ სხვა ადამიანების განცხადებებზე მინისტრებს, პროკურორებს უფლებამოსილება შევუჩოს.
"თუ ვინმეს ელემენტარული ლოგიკური აზროვნება აქვს, ის ძალიან მარტივად ამოხსნის ამ პრიმიტიულ პროვოკაციას. მერაბიშვილის განცხადებით, ამ "ფაქტს" ადგილი ჰქონდა 4 დღის წინ. რატომღაც ეს ცნობილი ხდება მხოლოდ გუშინ, მაშინ, როცა მას შეეძლო სამი დღის განმავლობაში, მოეთხოვა ადვოკატის, ან სახალხო დამცველის შესვლა. როგორც ჩანს, ეს არის ძალიან კარგად გამიზნული პროვოკაცია. წარმოიდგინეთ, რომ ხვალ ვიღაცამ განაცხადოს, რომ ახლა ზეწოლა განახორციელეს მათი განმარტებით, სხვა პოლიტიკურად დევნილ პატიმარზე. მაგალითად, შეიძლება თქვან, რომ იგივე ალასანიამ განახორციელა ზეწოლა ახალაიაზე, შემდეგ იტყვიან, რომ წულუკიანმა გაიტაცა კუბლაშვილი და ა.შ. ეს არის ძალიან პრიმიტიულად დაგეგმილი პროვოკაცია და ამ დროს მე მომთხოვენ მათი პრიმიტიული გათვლებით უფლებამოსილება შეუჩერო მთავარ პროკურორს და სოზარ სუბარს, შემდეგ მოითხოვენ წულუკიანზე, ალასანიაზე და ა.შ. მათი პრიმიტიული პროვოკაცია გათვლილია იმაზე რომ მოხდეს მთავრობის დისკრედიტაცია და რაც მთავარია მეორე ვერსია, რომელიც უფრო მჯერა რომ სარწმუნოა,
თუმცა არ გამოვრიცხავ, ორმაგი ეფექტიც არსებობდეს. ძალიან საეჭვოდ დაპანიკდნენ მას შემდეგ, რაც ახალმა პროკურორმა დაიწყო ჟვანიას საქმის გადახედვა და გამოძიება. ისინი ასევე ძალიან საეჭვოდ დაპანიკდნენ როცა ორი დღის წინ პროკურატურამ დააკავა ჟვანიას დაცვის ყოფილი წევრი, რომელიც ჟვანიას გარდაცვალებისას შემთხვევის ადგილზე იმყოფებოდა. ეს ყველაფერი ძალიან მარტივი ამოსახსნელია, ამიტომ მოვუწოდებ ყველას, დამთავრდეს ეს აჟიოტაჟი, მთავრობას უნდა მიეცეს ნორმალური მუშაობის საშუალება. ჩვენ არ ავყვებით არც ერთ პროვოკაციას ჩვენ არ გვაქვს იმის დრო და კომფორტი, რომ მერაბიშვილის თუ სხვა ადამიანების განცხადებებს გამოვეხმაუროთ და მათ განცხადებებზე მინისტრებს და პროკურორებს შევუჩეროთ უფლებამოსილება", _განაცხადა ღარიბაშვილმა.
