საგარეო უწყება საოკუპაციო ხაზის გასწვრივ რუსეთის საოკუპაციო ძალების უკანონო ქმედებებს გმობს და განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,საქართველოს საგარეო საქმეთა სამინისტრო გამოხატავს ღრმა შეშფოთებას ცხინვალის საოკუპაციო ხაზის გასწვრივ რუსეთის საოკუპაციო ძალების მიერ მავთულხლართების გავლების პროცესის განახლებასა და ე.წ. საზღვრის აღმნიშვნელი ბანერების დამონტაჟებასთან დაკავშირებით. უკანასკნელ პერიოდში, ბანერების მოწყობა მოხდა ქარელის რაიონის სოფლებში კნოლევი, ავლევი, ცერონისი, თამარაშენი, ღოღეთი, დირბი, დვანი და გორის რაიონის სოფლებში ერგნეთი, დიცი, ქერე, ფლავი, ფლავისმანი, მეჯვრისხევი, ციცაგიანთკარი, ზემო ნიქოზი.
რუსეთის საოკუპაციო ჯარის უკანონო ქმედებები უხეშად არღვევს საოკუპაციო ხაზის მიმდებარე ტერიტორიაზე მცხოვრები მოსახლეობის ფუნდამენტურ უფლებებს და თავისუფლებებს და იწვევს სავალალო ჰუმანიტარულ შედეგებს. ზემოხსენებული საგანგაშო პროცესების შედეგად, ადგილობრივი მოსახლეობა მოკლებული გახდა საკუთარ სასოფლო სამეურნეო ნაკვეთებზე საქმიანობის წარმოების, სასაფლაოზე შესვლის და პირველადი დახმარების მიღების უფლებას.
საგარეო საქმეთა სამინისტრო გმობს რუსეთის ფედერაციის პროვოკაციულ პოლიტიკას საქართველოს წინააღმდეგ - საერთაშორისო ვალდებულებების და ცეცხლის შეწყვეტის შეთანხმების სრული უგულვებელყოფით - რომელიც განსაკუთრებულ შეშფოთებას იწვევს მოსკოვის მხრიდან ძალის გამოუყენებლობის ვალდებულების აღებაზე უარის თქმის გათვალისწინებით.
საგარეო საქმეთა სამინისტრო დიდად აფასებს საერთაშორისო თანამეგობრობის მტკიცე პოზიციას რუსეთის ქმედებების უკანონობასთან დაკავშირებით და მოუწოდებს საერთაშორისო ორგანიზაციებს და პარტნიორ-სახელმწიფოებს, განაგრძონ ეფექტური ზომების მიღება საქართველოს სუვერენულ ტერიტორიაზე საგანგაშო პროცესების აღსაკვეთად", _ნათქვამია სამინისტროს განცხადებაში.
