3 დეკემბერს, განსაკუთრებული საჭიროებების მქონე პირთა საერთაშორისო დღესთან დაკავშირებით, საქართველოს იუსტიციის მინისტრი თეა წულუკიანი იუსტიციის სამინისტროსა სისტემაში მომუშავე შეზღუდული შესაძლებლობის მქონე თანამშრომლებს შეხვდა. ღონისძიებას ესწრებოდნენ, აგრეთვე, საჯარო რეესტრის თავმჯდომარე პაპუნა უგრეხელიძე, სახელმწიფო სერვისების განვითარების სააგენტოს, ნოტარიუსთა პალატის, აღსრულების ეროვნული ბიუროს, ეროვნული არქივისა და სმართ ლოჯიქის ხელმძღვანელები, სადაც განსაკუთრებული საჭიროებების მქონე პირები არიან დასაქმებული.
მინისტრმა და სსიპ-ების ხელმძღვანელებმა მათ საჩუქრები გადასცეს - სპეციალიზებული სავარძლები, ყავარჯნები, ადაპტირებული სამუშაო მაგიდები მათი საჭიროებებისა და ინტერესების გათვალისწინებით შეირჩა.
„მოგეხსენებათ, იუსტიციის სამინისტრო პირველი სახელმწიფო ორგანიზაციაა, რომელმაც 2008 წლიდან დაიწყო შეზღუდული შესაძლებლობების მქონე პირთა დასაქმების პროექტის განხორციელება. ჩვენ დღემდე განსაკუთრებულ ყურადღებას ვუთმობთ ასეთი თანაშრომლების პროფესიულ განვითარებას, ვცდილობთ მათი შესაძლებლობები მაქსიმალურად გამოვიყენოთ და ამით ხელი შევუწყოთ საზოგადოებაში მათ ინტეგრირებას" - აღნიშნა საჯარო რეესტრის თავმჯდომარემ პაპუნა უგრეხელიძემ.
3 დეკემბერი შეზღუდული შესაძლებლობების მქონე პირთა საერთაშორისო დღედ გაერთიანებული ერების ორგანიზაციის ინიციატივით 1992 წლიდან იქნა დაწესებული. ეს თარიღი კიდევ ერთხელ შეახსენებს საზოგადოებას, გამოიჩინოს ტოლერანტობა და გამოხატოს განსაკუთრებული მზრუნველობა შეზღუდული შესაძლებლობების მქონე მოქალაქეების მიმართ.
საჯარო რეესტრის ეროვნული სააგენტო ერთ-ერთი პირველია სახელმწიფო უწყებებს შორის, რომელმაც შეზღუდული შესაძლებლობების მქონე პირთა დასაქმების სოციალური პროექტი შექმნა და ამით სურვილი გამოხატა, საკუთარ სისტემაში შეზღუდული შესაძლებლობების მქონე ადამიანები დაესაქმებინა.
პროექტის განხორციელება სააგენტოში მას შემდეგ დაიწყო, რაც, საინფორმაციო და საკომუნიკაციო ტექნოლოგიების განვითარების ფონზე, უწყება სრულად გადავიდა ელექ¬ტ¬რონულ საქმისწარმოებაზე და შესაძლებელი გახდა პროცედურების დისტანციურად, ინტერნეტის მეშვეობით განხორციელება.
6 წელი სრულდება მას შემდეგ, რაც სააგენტომ შშმ პირთა პირველი ნაკადი დაასაქმა. ამჟამად საჯარო რეესტრის ეროვნულ სააგენტოში შეზღუდული შესაძლებლობის მქონე 15 პირი მუშაობს. მათ გააჩ¬ნიათ სათანადო ცოდნა და გამოცდილება, თუმცა მოკლებულნი არიან გადაადგილების უნარს და შე¬საბამისად სამსახურებრივ ფუნქციებს საკუთარი საცხოვრებელი სახლიდან გაუსვლელად ასრულებენ. სააგენტომ მათ სათანადო სწავლება ჩაუტარა, კომპიუტერული და საოფისე ტექნიკაც გადასცა და ადგილზე შეუქმნა ყველა სამუშაო პირობა; თუმცა, სურვილის შემთხვევაში, იუსტიციის სახლების და საჯარო რეესტრის ოფისების ადაპტირებული გარემო (ავტოსადგომი, პანდუსები და სხვ.) მათ საშუალებას აძლევს, დაკისრებული უფლება-მოვალეობები სამსახურშიც განახორციელონ. მსგავსი პროექტით შეზღუდული შესაძლებლობების მქონე პირებს საზოგადოებრივ ცხოვრებაში ჩართვისა და საკუთარი შესაძლებლობების რეალიზაციის საშუალება მიეცათ.
სულ ცოტა ხნის წინ, საჯარო რეესტრის ხელმძღვანელობამ შეზღუდული ფიზიკური შესაძლებლობების მქონე თანამშრომლებს გააცნო გადაწყვეტილება, რომლის მიხედვით ოპტიმიზირდა მათი სა¬მუშაო გრაფიკი და სამსახურებრივი დატვირთვა; აღსანიშნავია, რომ შეზღუდული შესაძლებლობების მქონე თანამშრომლები უკვე სარგებლობენ იმავე სადაზღვევო პაკეტით, რითიც დღეს სააგენტოს მენეჯმენტი სარგებლობს (პირველი კლასის სადაზღვევო პაკეტი). მათ სამუშაო ადგილებზე მიეწოდებათ მაღალსიჩქარიანი ინტერნეტი, უზრუნველყოფილნი არიან კორპორატიული სატელეფონო კავშირით და სარგებლობენ სხვა უპირატესობებით. სულ მალე სპეციალურად მათთვის იუსტიციის სახლებთან მოეწყობა ადაპტირებული ავტოსადგომი იზოლირებული შესასვლელით.
იუსტიციის სამინისტრო, საკუთარი შესაძლებლობების ფარგლებში ცდილობს, მზურნველობა გამოიჩინოს განსაკუთრებული საჭიროებების მქონე პირთა მიმართ. სპეციალურად მათთვის სამინისტროს სამსახურებში ფუნქციონირებს დასაქმების პროგრამა, რომლის ფარგლებშიც უკვე მუშაობს 30-მდე შეზღუდული შესაძლებლობების მქონე პირი. იუსტიციის სახლებისა და სამინისტროს ადმინისტრაციული შენობები მაქსიმალურადაა მორგებული მათ საჭირობებს; გადაადგილება, მუშაობა თუ სხვადასხვა მომსახურებით სარგებლობა შეზღუდული შესაძლებლობების მქონე პირებს დამოუკიდებლად შეუძლიათ