მედიაკავშირ "ობიექტივის" ხელმძღვანელი ირმა ინაშვილი facebook-ის გერდზე წერს, რომ საქართველოში ძველი დრო ბრუნდება და ირაკლი მელაშვილისა და ზაზა მეფარიშვილის თანამდებობიდან გადაყენებას მოითხოვს.
"ძველი დრო ბრუნდება?!
საზოგადოებას ვუზიარებ ჩემს გულისტკივილს და გაოცებას: სამი დღის მანძილზე ბატონი ზაზა მეფარიშვილი (იმერეთის რეგიონის უშიშროების სამსახურის ხელმძღვანელი) და ბატონი ირაკლი მელაშვილი (რომელიც პრემიერის მრჩეველია და რეგიონებს კურირებს) იბარებენ ქუთაისის საკრებულოს წევრებს. აშინებენ, ემუქრებიან და აიძულებენ,- დატოვონ ფრაქცია "საქართველოს პატრიოტთა ალიანსი".
ჩემი ინფორმაციით, დღეს ფრაქციის 5 წევრს უკვე დააწერინეს განცხადება (ხვალინდელი რიცხვით) და ატოვებინებენ ფრაქციას.
გაუგებარია, ქვეყნის უშიშროების სამსახურის ერთ-ერთი მაღალჩინოსანი, იმერეთის რეგიონის ხელმძღვანელი, რომელიც სახელმწიფოს უსაფრთხოების დასაცავად უნდა ზრუნავდეს, რატომაა დაკავებული ქუთაისის საკრებულოს დეპუტატების დატერორებით?!
მე მეგონა, რომ ეს მანკიერება ჩვენი ცხოვრებიდან აღმოიფხვრა, მაგრამ არიან მაღალჩინოსნები, რომლებიც მუდმივად ძველ დროში გვაბრუნებენ.
მაგალითად, ბატონ ირაკლი მელაშვილს „რეგიონების კურირება" , როგორც ჩანს, წარმოუდგენია, როგორც ქვეყნის მასშტაბით საკრებულოს წევრების დატერორება, დაშლა- დანაწევრება. გაუგებარია, - ვისი ინტერესის სასარგებლოდ ხდება ყოველივე ეს? თავად ბატონი მელაშვილის, თუ „ქართული ოცნების"?!
დიდხანია თვალს ვადევნებ ქუთაისის საკრებულოში მელაშვილ- მეფარიშვილის მავნებლურ საქმიანობას. (უბრალოდ, სხვა შეფასება ასე ზუსტად ვერ გამოხატავს პროცესის არსს); ანალოგიურად იქცეოდნენ სააკაშვილის ჩინოვნიკები. ჩნდება კითხვა: რა შეიცვალა?!
ირაკლი ღარ იბაშვილის ერთ-ერთ მიღწევად მიმაჩნდა და მიმაჩნია ძალოვანი სტურქტურების დეპოლიტიზება... ის, რომ ძალოვანი სფეროს წარმომადგენლები აღარ ეწევიან საზოგადოების დაშინებასა და შანტაჟს. თუმცა, ამას ვერ ვიტყვით მელაშვილ-მეფარიშვილის ტანდემზე, რომელიც ცინიკურად ატერორებდა და ატერორებს საკრებულოს წევრებს. დამაფიქრებელია, რომ ეს ყველაფერი კეთდებოდა ირაკლი ღარიბაშვილის სახელით. მე კი, ზუსტად ვიცი, რომ ღარიბაშვილი აქ არაფერ შუაშია.
მივმართავ ახალ პრემიერ- მინისტრს, ბატონ ირაკლი ღარიბაშვილს: ბატონო პრემიერ-მინისტრო, გთხოვთ, სასწრაფოდ შეიწავლოთ ეს საკითხი და ზემოხსენებული ორივე მაღალჩინოსანი გაათავისუფლოთ დაკავებული თანამდებობიდან.
ამიერიდან ამ თემას არ მივატოვებთ," - წერს ინაშვილი.
მასალის გამოყენების პირობები