საპარლამენტო უმცირესობის ლიდერის დავით ბაქრაძის განცხადებით ახალი მთავრობა უფრო დიდი გამოწვევების წინაშეა, ვიდრე ერთი წლის წინ იყო. ამის შესახებ ბაქრაძის მიერ სოციალურ ქსელში გავრცელებულ განცხადებაშია აღნიშნული, სადაც ის მიზეზებიც არის განმარტებული, რის გამოც ბაქრაძე საკანონმდებლო ორგანოში არ იმყოფება.
,,ბატონებო, მოგეხსენებათ, 13 ნოემბრიდან ვიმყოფებოდი ამერიკის შეერთებულ შტატებში, სადაც ვესწრებოდი საპარლამენტთაშორისო კავშირების (IPU) კონფერენციას, აგრეთვე გავმართე შეხვედრები გაერთიანებული ერების ორგანიზაციაშიც.
სამწუხაროდ, რეისის გადადების გამო შევფერხდი და ვერ ვესწრები ქვეყნისათვის ესოდენ მნიშვნელოვან სხდომას პარლამენტში, სადაც მიმდინარეობს ახალი მინისტრთა კაბინეტის დამტკიცება და დებატები ქვეყანაში მიმდინარე პროცესების ირგვლივ.
მინდა ვისარგებლო შემთხვევით და ვუსურვო ახალ მთავრობას, რომ შეძლოს გააანალიზოს თავისი წინამორბედის შეცდომები და ნაკლოვანებები, რამაც არ მისცა მას საშუალება შეესრულებინა საკუთარი წინასაარჩევნო დაპირებები და გაემართლებინა ხალხის მოლოდინი.
სამწუხაროდ, მათ ვერ შექმნეს ახალი სამუშაო ადგილები, ვერ უზრუნველყვეს ეკონომიკური ზრდის ტემპის შენარჩუნება და მოსახლეობისთვის უსაფრთხო გარემოს შექმნა. უფრო მეტიც, დღეს ახალი მთავრობა უფრო დიდი გამოწვევების წინაშეა, ვიდრე ერთი წლის წინ იყო: შეჩერებულია ეკონომიკა, იზრდება კრიმინალი, უქმდება სამუშაო ადგილები. ვუსურვებ მათ, გამოასწორონ ეს შეცდომები", _ნათქვამია ბაქრაძის განცხადებაში.
