თბილისის საკრებულოს თავმჯდომარის მოადგილე ჯაბა სამუშია თბილისის მერს გიგი უგულავას კომპანია "სითი პარკთან" ჯარიმების შემცირებასთან დაკავშირებით მოლაპარაკებების დაწყებისკენ მოუწოდებს. ამის შესახებ სამუშაიამ ,,პრაიმ ტაიმის" პრესკლუბში სტუმრობისას განაცხადა, რომელიც მერიასა და ,,სითი პარკს" შორის შესაძლო გარიგებაზეც მიუთითებს.
სამუშიას ინფორმაციით, "სითი პარკი" ყოველწლიურად მარტო 10-ლარიანი ჯარიმებიდან 4 მილიონ ლარს იღებს, მანქანების გადაყვანისთვის 70-ლარიან ჯარიმაზე, თითქმის 3 მილიონამდე ლარს იღებს, 50-ლარიანი შენატანიდან კი კომპანიის შემოსავალი დაახლოებით 20 მილიონ ლარს შეადგენს.
,,ეს თანხები შედის კომპანიაში, რომელმაც მხოლოდ მიზერული თანხის ინვესტიცია განახორციელა. იმის გათვალისწინებით, რომ ჯარიმების და შემოსული თანხების გარკვეული რაოდენობა ქალაქის ბიუჯეტში მიდის, მოვუწოდებ თბილისის მერს, სასწრაფოდ დაიწყოს მოლაპარაკება "სითი პარკთან" აღნიშნული ჯარიმების შემცირებასთან დაკავშირებით", _აცხადებს სამუშია.