უნიკალური გერმანული გამოფენა - „შეეხე მათემატიკას" პირველად ჩამოდის საქართველოში და მას 12 ნოემბერიდან 6 დეკემბერამდე პროკრედიტ ბანკის სათავო ოფისი უმასპინძლებს. ქართველ მასწავლებლებსა და მოსწავლეებს, სხვადასხვა ასაკისა და ცოდნის მქონე ადამიანებს ეძლევათ საშუალება, ერთი თვის მანძილზე, სრულიად უფასოდ, დაათვალიერონ გამოფენა და თავად ჩაატარონ სხვადასხვა სახის ექსპერიმენტები.
სტუმრები 8 წლის ასაკიდან შეძლებენ ამოხსნან თავსატეხები, ააშენონ ხიდები, გამოიცნონ თავბრუდამხვევი ამოცანები და შექმნან მშვენიერი საპნის ბუშტები - ეს არის აქტივობები, რომლებიც, მათემატიკას ეფუძნება და ხელს უწყობს მისი საჭიროების აღქმას ყოველდღიურ ცხოვრებაში.
გამოფენა - „შეეხე მათემატიკას" წარმოგვიდგენს ახლებურ მიდგომას, რომელიც ეხმარება ადამიანებს შეიცნონ მარტივი მოვლენები მათემატიკის დახმარებით. 24-ივე ექსპონატი გონების აქტიური სავარჯიშოა და მონაწილეებს საშუალებას აძლევს საკუთარი ხელებით შეეხონ და ამოხსნან პრაქტიკული ამოცანები.
გამოფენა პროკრედიტ ბანკმა გოეთეს ინსტიტუტის მხარდაჭერით გერმანიის ქალაქ გისენში მდებარე მსოფლიოში პირველი ინტერაქტიული მათემატიკური მუზეუმიდან "მათემატიკუმი" ჩამოიტანა. ეს კონკრეტული გამოფენა კი ყველაზე პოპულარულ ექსპონანტებს წარმოადგენს და უკვე 1.5 მილიონმა სტუმარმა მოინახულა.
დოქტორი საშა ტერნესი, პროკრედიტ ბანკის გენერალური დირექტორი:
"პროკრედიტ ბანკი საქართველო მოხარულია, ორგანიზება და მასპინძლობა გაუწიოს უნიკალურ გერმანულ გამოფენას „შეეხე მათემატიკას ". ეს გამოფენა გახლავთ პროექტი, რომელსაც ჩვენ ყველაზე ხანგრძლივ მასპინძლობას გავუწევთ და იმედი გვაქვს, რომ ეს ოთხი კვირა ძალზე საინტერესო იქნება ქართველი ბავშვებისა და უფროსებისათვის. ეს გამოფენა კიდევ ერთხელ გაუსვამს ხაზს მათემატიკის, როგორც მეცნიერების მნიშვნელობას".
გერლინდა მასუდი, „გეოთეს ინსტიტუტი", საქართველო:
„ეს გამოფენა საოცარი ღონისძიებაა ოჯახისათვის და ამაღელვებელი გამოცდილებაა მათთვის, ვინც არ მეგობრობდა სკოლაში მათემატიკასთან, ასევე მათთვისაც, ვინც ფიქრობს, რომ უკვე ყველაფერი იციან მათემატიკის შესახებ. მოუთმენლად ველით ჩვენი პირველი პროექტის დაწყებას პროკრედიტ ბანკ საქართველოსთან ერთად, უკეთეს ადგილს ამ გამოფენის მოსაწყობად ვერც კი წარმოვიდგენდით".
გამოფენა „შეეხე მათემატიკას" 12 ნოემბერიდან 6 დეკემბერის ჩათვლით, სამშაბათი-პარასკევი 11:00-დან 18:00-მდე, ხოლო შაბათ-კვირას - 12:00-დან 18:00-მდე ელოდება მნახველებს პროკრედიტ ბანკის სათავო ოფისის პირველ სართულზე (ალ. ყაზბეგის 21).
შესვლა უფასოა.
პარალელურ რეჟიმში, საქართველოს „გოეთეს ინსტიტუტის" მიერ შემოთავაზებული იქნება ინტერაქტიური სემინარები ბავშვებისათვის, საჯარო ლექციები და გიდების თანხლებით ჩატარდება ტურები სკოლებისათვის. ამისათვის საჭიროა წინასწარი რეგისტრაცია - საკონტაქტო პირები: ქეთი ტიბუა, ანა მშვილდაძე - 293 89 45; ელ-ფოსტა: sbbko@tbilissi.goethe.org
მასალის გამოყენების პირობები