შინაგან საქმეთა ყოფილი მინისტრი ვანო მერაბიშვილი ზუგდიდში, პოლიციელისთვის ყურის მოჭრის ფაქტთან დაკავშირებით განცხადებას ავრცელებს, რომელსაც "ჯი-ეიჩ-ენი" უცვლელად გთავაზობთ:
მინდა გამოვეხმაურო ზუგდიდში მომხდარ შემზარავ ფაქტს, როდესაც პოლიციის თანამშრომელი გახდა არაადამიანური წამების მსხვერპლი. მე მესმის, რომ ის ბრალდება, რომელიც მის წინააღმდეგ გაისმის საკმაოდ მძიმეა და დადასტურების შემთხვევაში იგი აუცილებლად უნდა იქნეს უმკაცრესად დასჯილი. თუმცა, მიუხედავად იმისა დამნაშავეა თუ არა ეს კონკრეტული პოლიციელი, მიმაჩნია, რომ კიდევ უფრო საგანგაშო ფაქტია მოქალაქის მიერ მართლმსაჯულების აღსრულების საკუთარ ხელში აღება. მინდა ყველას შევახსენო, რომ ძალის გამოყენების და სამართლის დაცვის ერთადერთი ლეგიტიმური უფლება სახელმწიფოს აქვს და ყველა სხვა მცდელობა წარმოადგენს ამ სახელმწიფოს წინააღმდეგ მოქმედებას. რიგითი მოქალაქეების მიერ მართლმსაჯულების განხორციელების საკუთარ თავზე აღება ნიშნავს სახელმწიფო ინსტიტუტების მიმართ მათ უნდობლობას და გვაბრუნებს ჩვენ იმ ბნელ წარსულში, რომლიდანაც გამოსვლა მხოლოდ უკანასკნელი 9 წლის განმავლობაში მოვახერხეთ,"- აცხადებს ვანო მერაბიშვილი.
ცნობისთვის, ზუგდიდში, პრეზიდენტის რეზიდენციის მიმდებარე ტერიტორიაზე პატრულის თანამშრომელი გააშიშვლეს და ყური მოაჭრეს. არსებული ინფორმაციით, სამართალდამცველს სხეულის სხვადასხვა სახის დაზიანებებიც აღენიშნება.
როგორც "ჯი-ეიჩ-ენს" შინაგან საქმეთა სამინისტროს საზოგადოებასთან ურთიერთობის სამსახურის უფროსმა ნინო გიორგობიანმა განუცხადა, სამართალდამცველის დაჭრაში ეჭვმიტანილი გოგა ანჩაბაძის მეჯვარეა.
გავრცელებული ინფორმაციით, პატრულის თანამშრომელი მეჯვარის მეუღლის გაუპატიურების მცდელობის გამო მისმა მეჯვარემ დაჭრა. შსს-ს საზოგადოებასთან ურთიერთობის სამსახურის უფროსი განმარტავს, რომ გამოძიება გაუპატიურების მცდელობის ვერსიაზეც დაიწყება.
ამ დროისთვის დაჭრილი სამართალდამცველი ზუგდიდის საავადმყოფოს რეანიმაციულ განყოფილებაშია გადაყვანილი. მას ყური აქვს მოჭრილი და სხეულის სხვადასხვა დაზიანებები აღენიშნება. მედიკოსების ინფორმაციით, პაციენტის ჯანმრთელობის მდგომარეობა მძიმეა.
პოლიციელი ზუგდიდში დაახლოებით 12:00 საათზე იპოვეს. იგი შიშველ მდგომარეობაში იყო და სამართალდამცველის ფორმა იქვე, დაჭრილ მდგომარეობაში იდო.
