„ეხლა ვიმყოფებით მარნეულში, სადაც დასრულდა სარეაბილიტაციო სამუშაოები ობიექტზე, რომელშიც ბინა 24-მა დევნილმა ოჯახმა მიიღო. კიდევ რამდენიმე ოჯახი რჩება მარნეულში მძიმე პირობებში. ჩვენ ყველა ღონეს ვიხმართ, რომ მომავალში მათაც მოვუგვაროთ ეს პრობლემა. გასული ერთი წლის მანძილზე, ამ ობიექტის ჩათვლით, უკვე 926 ბინა გადავეცით დევნილებს. დაახლოებით ამდენივე გამზადებულია და წლის ბოლომდე განაწილდება. ყველაფერი ეს, 5000-6000 ადამიანის საცხოვრებელი პირობების გრძელვადიან პერსპექტივაში გაუმჯობესებას გულისხმობს. მინდა ყვალას მადლობა გადავუხადო, ვინც ამაში შეიტანა წვლილი და მივულოცო ვისაც გადაუწყდა დღეს განსახლების პრობლემა. ვინც ჯერ კიდევ რჩება რთულ მდგომარეობაში, ისინი მინდა დავამშვიდო და დავაიმედო, რომ ხელისუფლება ყველაფერს გააკეთებს უახლოეს მომავალში მათი საბინაო უზრუნველყოფისათვის და რაც მთავარია, მათი დაბრუნებისათვის მშობლიურ მიწა-წყალზე" - განაცხადა მინისტრმა დავით დარახველიძემ.
მარნეულის მუნიციპალიტეტში, ყოფილი საბავშვო ბაღის შენობის რეაბილიტაცია, საქართველოს მუნიციპალური განვითარების ფონდმა ამერიკის შეერთებული შტატების საერთაშორისო განვითარების სააგენტოს (USAID-ის) დაფინანსებით განახორციელა. სამუშაოების საერთო ღირებულება 855821.76 ლარია.
შესახლებამდე რამდენიმე დღით ადრე, ბინები ფარული კენჭისყრის პრინციპით განაწილდა. კენჭისყრის მიხედვით გამოვლინდა, თუ ვინ რომელ სართულზე მიიღებდა საცხოვრებელ ფართს.
ყველა ბინაში ინდივიდუალური სველი წერტილია, სამზარეულოებში დამონტაჟდა წყლის გამათბობლები და კარმის ტიპის გაზგამათბობლები. ეზოში მოწყობილია სათამაშო ატრაქციონი და ავტოსადგომი. დამონტაჟებულია გარე განათების ქსელი და დეკორატიული სანათები.
მშენებლობაზე დევნილი მოსახლეობაც იყო დასაქმებული.