თბილისში, 85 დევნილ ოჯახს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ ბინები გადასცა.
„ჩვენ, თბილისში, თითო კვირის ინტერვალით, წლის ბოლომდე, რამდენიმე ასეულ ოჯახს კიდევ გადავცემთ საცხოვრებელ ფართებს. ეს პროცესი გაგრძელდება მუდმივად, მომავალი წლის მანძილზეც. ასე რომ, მინდა დავამშვიდო ყველა, ის დაპირება, რაც ახალმა მთავრობამ გასცა, დევნილთა მიმართ, სრულდება" - განაცხადა დავით დარახველიძემ.
ყვარლის ქუჩაზე მდებარე ყოფილი სკოლის შენობას დევნილთა სამინისტრომ სარეაბილიტაციო სამუშაოები ჩაუტარა და საცხოვებლად გადააკეთა.
„დღევანდელი დღე არის შედეგი იმ მუშაობის და ძალისხმევის, რაც ახალმა ხელისუფლებამ გააკეთა დევნილთა საზოგადოებისთვის. მე მინდა განსაკუთრებული მადლობა გადავუხადო სამინისტროს და მინისტრს, იმისათვის, რომ ჩვენთან, დეპუტეტებთან ერთად ძალიან ბევრი იმუშავა, რათა ეს ყველაფერი გაკეთებულიყო" - აღნიშნა სამგორის რაიონის მაჟორიტარმა დეპიტატიმა ზურაბ აბაშიძემ.
სამინისტრომ, შერჩეული 85 ოჯახის შესახებ ინფორმაცია რამდენიმე დღით ადრე გაასაჯაროვა, რათა დევნილებს ჰქონოდათ საშუალება გაეგოთ, თუ როგორ მოხდა, კრიტერიუმების შესაბამისად, მათთვის ბინების გადაცემა.
შესახლებამდე ორი დღით ადრე დევნილთა სამინისტროში ბინები ფარული კენჭისყრის პრინციპით განაწილდა. კენჭისყრის მიხედვით გამოვლინდა, თუ ვინ რომელ სართულზე მიიღებს საცხოვრებელ ფართს. შენობაში სულ 85 ბინაა, აქედან 31 ერთოთახიანი, 44 ოროთახიანი და 10 სამოთახიანი.
მიმდინარე წლის ბოლომდე კიდევ 1000-ზე მეტი დევნილი ოჯახი მიიღებს ბინას, რაც იმას ნიშნავს, რომ დევნილთა სამინისტროს ერთწლიანი მუშაობის შედეგად 2000-მდე ოჯახმა, დევნილთა გრძელვანიანი განსახლების პროექტის ფარგლებში, გაიუმჯობესა საცხოვრებელი პირობები.
მასალის გამოყენების პირობები