2013 წლის ადამიანებისა და კომპანიების - „ოქროს პერგამენტის" ლაურეატობის კანდიდატების გამოსავლენად სარეიტინგო გამოკითხვა დაიწყო.
„ოქროს პერგამენტის" ლაურეატების დაჯილდოება, ტრადიციულად, 24 დეკემბერს გაიმართება. დაჯილდოების ცერემონიალს წელს ღონისძიების გენერალური სპონსორი - კაზინო „შანგრი ლა" უმასპინძლებს.
„დღეიდან დავიწყეთ სარეიტინგო გამოკითხვა - ნომინაციების მიხედვით კანდიდატების შერჩევა. დეკემბრის დასაწყისში კი გამოკითხვას მთელი საქართველოს მასშტაბით დავიწყებთ. ტრადიციულად, ერთადერთი ნომინაცია, სადაც რესპოდენტებს მიეცემათ თავისუფალი არჩევნის საშუალება, არის "წლის ადამიანი". სხვა ნომინაციებში გამოკითხვის ანკეტაში მითითებული იქნებიან კონკრეტული კანდიდატები, რომლებიც რეიტინგული გამოკითხვით შეირჩევიან", - აცხადებს GHN-ის გენერალური დირექტორი გოჩა მირცხულავა.
„ოქროს პერგამენტის" ლაურეატები 12 ნომინაციაში დასახელდებიან. აქედან 11 გამარჯვებული გამოკითხვის საფუძველზე გამოვლინდება, ხოლო ერთ ნომინანტს ორგანიზატორი - ახალი ამბების სააგენტო GHN - დაასახელებს. საკონსულტაციო კვლევითი ჯგუფი „GCG"-ის მიერ გამოკითხული იქნება 3 000-მდე რესპოდენტი. გამოკითხვა საქართველოს მასშტაბით ჩატარდება.
2013 წლის „ოქროს პერგამენტის" ლაურეატები გამოვლინდებიან შემდეგ ნომინაციებში: წლის ადამიანი, პოლიტიკოსი, ბიზნესმენი, ხელოვანი, ჟურნალისტი, სპორტსმენი, წლის პროექტი, კომპანია, ბრენდი, კომუნიკატორი, უცხოური კომპანია და „ოქროს პერგამენტის" საპატიო ლაურეატი.
მირცხულავას განცხადებით, წელს დაჯილდობის ცერემონიალი საკმაოდ განსხვავებული და მეტად საინტერესო იქნება, რაზედაც გენერალური სპონსორი კაზინო „შანგრი ლა" იზრუნებს.
"ცერემონილის ჩატარების ადგილთან და გენერალურ სპონსორობასთან დაკავშირებით საკმაოდ საინტერესო შემოთავაზებები გვქონდა სხვადასხვა კომპანიისგან. მოგეხსენებათ, უცხოეთში კაზინო არ არის მხოლოდ „სათამაშო სახლი", აქ იმართება პრეზენტაციები, საქველმოქმედო საღამოები. შესაბამისად, მეტად საინტერესო წინადადება მივიღეთ კაზინო „შანგრი ლასგან", რომელსაც დავთანხმდით. დაჯილდოების ცერემონიალის გარდა, დამსწრე საზოგადოებას შესაძლებლობა ექნება, მონაწილეობა მიიღოს გენერალური სპონსორის მიერ ორგანიზებულ ღონისძიებაში", - აცხადებს მირცხულავა.
ღონისძიების საინფორმაციო მხარდამჭერები: GHN, რუსთავი 2, ტვ3, რადიო „ფორტუნა", გაზეთი „პრემიერი",გაზეთი"ვერსია", გაზეთი „ქართული სიტყვა", "მთავარი.ინფო".
გასულ წლებში სხვადასხვა ნომინაციაში "ოქროს პერგამენტის" ლაურეატები არიან: საქართველოს კათალიკოს-პეტრიარქი ილია მეორე, პაატა ბურჭულაძე, ჭაბუა ამირეჯიბი, მიხეილ სააკაშვილი, ირაკლი ალასანია, თეა წულუკიანი, ნინო ბურჯანაძე, გიორგი თარგამაძე, რობერტ სტურუა, ზურაბ ლეჟავა, გიორგი ოვაშვილი, რუსუდან ჭყონია, დავით კიკალიშვილი, ინგა გრიგოლია, ვახო სანაია, ნინო შუბლაძე, ია ანთაძე, ნოდარ მელაძე, თეა სიჭინავა, ეკა კვესიტაძე, დენის კიფი, პატრიცია ფლორი, მამუკა ხაზარაძე, გიორგი გოგუაძე,პაატა კურტანიძე, მაია რჩეულიშვილი, გელა მთვივლიშვილი, სოსო ფხაკაძე, მანუჩარ კვირკველია, საქართველოს საკალათბურთო ნაკრები, საქართველოს მორაგბეთა ნაკრები, ირაკლი ცირეკიძე, ნოდარ ქუმარიტაშვილი, ნიკოლოზ ვაჩეიშვილი, კობა სუბელიანი, სანდრა რულოვსი,"გმირი" - თაკო ფხაკაძე, "ვანის საგანძური" - დავით ლორთქიფანიძე, „საქართველოს ვარსკვლავი", "ნათელი ქრისტესი - საქართველო" - ნესტან კირთაძე, "ფონდი "იავნანა" - პაატა ბურჭულაძე, "ძველი თბილისის ახალი სიცოცხლე", "აღმაშენებლის გამზირი და განახლებული გუდაური" - გიგი უგულავა, "ლუდსახარში ნატახტარი, "გალფი", „თეგეტა მოტორსი", „სმარტი", „კავკასუს ინლაიანი", „რომპეტროლი", "კავკასუს ინლაიანი", "იმედი L", "თელიანი ველი", "ავერსი", "აქსისი", თი-ბი-სი ბანკი, საქართველოს ბანკი, "ჯეოსელი", "მაგთი", "სახალხო ბანკი", "სოკარი", "ლიბერთი ბანკი", „ბანკი რესპუბლიკა".