ეგეოსის ზღვაში ჩაძირული ხომალდის გადარჩენილი ქართველი მეზღვაურები საქართველოში დღეს დაბრუნდნენ.
როგორც ერთ-ერთმა მეზღვაურმა მამუკა კერესელიძემ "რუსთავი 2"-თან საუბრისას განაცხადა, გემის ჩაძირავამდე ეკიპაჟის წევრებმა ძლიერი შეჯახების ხმა გაიგეს და კაპიტნის ბრძანებით ხომალდის შემოწმება დაიწყეს.
მისივე თქმით, შემოწმების შედეგად დაზიანება იმდენად სერიოზული აღმოჩნდა, რომ კაპიტანმა გემის დატოვების გადაწყვეტილება მიიღო და ეკიპაჟის წევრებთან ერთად სამაშველო ნავში გადაინაცვლა, თუმცა ამის შემდეგ კაპიტანი არავის უნახავს და მისი ძებნა ამ დრომდე გრძელდება.
"შემოწმების შედეგად იმდენად დიდი ჭრილი აღმოჩნდა, რომ ვერანაირიი მექანიკური საშუალება ვერ უშველიდა. გემმა მარჯვენა მხარეზე გადაიწია და იმდენად სწრაფად მიდიოდა, რომ კაპიტანმა გასცა ბრძანება, რომ უკვე გემი უნდა დაგვეტოვებინა. მე წავედი უკანა პლოტზე და ყველა ერთად ვეძებდით კაპიტანს, მის სახელს ვიძახდით, მაგრამ სამწუხაროდ ლეანი არ გამოჩნდა. დღემდე გაურკვეველია ჩვენთვის ეს კაცი სად წავიდა და რა ქნა,"- განუცხადა "რუსთავი 2"-ს მამუკა კერესელიძემ.
სიერა ლეონეს დროშის ქვეშ მცურავი სატვირთო ხომალდი "სტელა" ეგეოსის ზღვაში რამდენიმე დღის წინ ჩაიძირა. ეკიპაჟის ყველა წევრი ქართველი იყო.
