ლატვიაში ოფიციალური ვიზიტით მყოფმა საქართველოს პარლამენტის თავმჯდომარემ, დავით უსუფაშვილმა მონაწილეობა მიიღო რიგის სამართლის უმაღლეს სკოლაში გამართულ მრგვალ მაგიდაში
თემაზე: "საქართველო და აღმოსავლეთ პარტნიორობა: საპრეზიდენტო არჩევნების შემდეგ, ვილნიუსის სამიტამდე".
შეხვედრა ლატვიის სეიმის თავმჯდომარემ, სოლვიტა აბოლტინამ გახსნა. მან ისაუბრა საქართველოში განხორციელებულ რეფორმებზე, ვილნიუსის "აღმოსავლეთ პარტნიორობის" სამიტზე, ასოცირების ხელშეკრულებაზე და ორ ქვეყანას შორის თანამშრომლობაზე.
დავით უსუფაშვილმა მრგვალი მაგიდის მონაწილეებს გააცნო საქართველოს პარლამენტის დელაგაციის ლატვიაში ვიზიტის მიზნები, ქვეყანაში მიმდინარე პოლიტიკური პროცესები, ახალი ხელისუფლების პრიორიტეტები და ამოცანები. საქართველოს პარლამენტის თავმჯდომარემ აღნიშნა, რომ ხელისუფლების ამოცანაა ქვეყანაში ევროპული სტანდარტების დამკვიდრება. "ევროპული
არჩევანი არის ჩვენი არჩევანი, ევროპული არჩევანი არის ქართველი ხალხის არჩევანი და ბოლო არჩევნებმა ეს კიდევ ერთხელ დაადასტურა", - განაცხადა დავით უსუფაშვილმა. პარლამენტის თავმჯდომარემ ყურადღება გაამახვილა პარტნიორ ქვეყნებთან ეკონომიკური ურთიერთობების გაღრმავების აუცილებლობაზე და საქართველოს წინაშე მდგარ საგარეო
გამოწვევებზე. დავით უსუფაშვილის გამოსვლის შემდეგ შეხვედრა კითხვა-პასუხის რეჟიმში გაგრძელდა. შეხვედრაში მონაწილეობა მიიღეს ლატვიის სეიმის წევრებმა, ექსპერტებმა, ლატვიაში აკრედიტებულმა დიპლომატიური კორპუსის წარმომადგენლებმა და საქართველოს პარლამენტის დელეგაციის წევრებმა: თედო ჯაფარიძემ, ვიქტორ დოლიძემ, გიორგი გაჩეჩილაძემ და დავით დარჩიაშვილმა.
მრგვალი მაგიდის დასრულების შემდეგ, დავით უსუფაშვილი და საპარლამენტო დელეგაციის წევრები რიგის სამართლის სკოლაში ლატვიის სხვადასხვა უმაღლესი სასწავლებლების ქართველ სტუდენტებს შეხვდნენ და მათ შეკითხვებს უპასუხეს.
დღეს, საქართველოს პარლამენტის თავმჯდომარემ, დავით უსუფაშვილმა ლატვიაში ოფიციალური ვიზიტი დაასრულა, საიდანაც იგი, ასევე ოფიცილური ვიზიტით ლიტვაში გაემგზავრება.