თბილისის სააპელაციო სასამართლომ ვიცე-მერის, სევდია უგრეხელიძის მიერ გათავისუფლებული თანამშრომელი თეონა ქველაძე მერიაში სამსახურში აღადგინა.
სასამართლოს გადაწყვეტილება ჟურნალისტებს დღეს თბილისის საკრებულოს იურიდიულ საკითხთა კომისიის თავმჯდომარემ დავით ჯინჭარაძემ პირადად გააცნო. როგორც დავით ჯინჭარაძემ დღეს გამართულ ბრიფინგზე განაცხადა, თეონა ქველაძეს მას შემდეგ დაატოვებინეს სამსახური, რაც მისმა ძმამ, საკრებულოს დეპუტატმა გიორგი ქველაძემ ფრაქცია " ,,ნაციონალური მოძრაობა" დატოვა.
" თეონა თბილისის მერიაში, ვიცე-მერის აპარატში მთავარი სპეციალისტის თანამდებობაზე მუშაობდა. როგორც მოგახსენეთ, დაკავებული თანამდებობიდან მისი გათავისუფლება შეთითხნილი ბრალდებებით მოხდა. ჩვენ გამოვიყენეთ კანონით განსაზღვრული უფლება და თბილისის მერიის ადმინისტრაციის აქტი შემდეგ ინსტანციაში გავასაჩივრეთ. სააპელაციო სასამართლომ ჩვენი საჩივარი დააკმაყოფილა და თეონა ქველაძე სამსახურში აღადგინეს. კაკონის გათვალისწინებით მას თბილისის მერიის მხრიდან მიყენებული ზარალი უნდა აუნაზღაურდეს.ეს არის მართლაც სამართლიანობის აღდგენა და მიგვაჩნია, რომ სასამართლომ მიიღო კანონიერი და სამართლიანი გადაწყვეტილება ",- განაცხადა დავით ჯინჭარაძემ.
დეპუტატის თქმით, თეონა ქველაძის სამსახურში აღდგენა, სასამართლო გადაწყვეტილების მიხედვით უახლოეს ოცდახუთ დღეში უნდა მოხდეს. თუკი თბილისის მერიამ აღნიშნული პროცესი გააჭიანურა, პროცესში სააღსრულებო ბიურო ჩაერთვება.
