საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე, ევროსაბჭოს მიგრაციის, ლტოლვილთა და იძულებით გადაადგილებულ პირთა კომიტეტის მომხსენებელს რენე რუკეს შეხვდა.
რენე რუკე საქართველოში დევნილთა პრობლემების შესასწავლად იმყოფება. მინისტრთან შეხვედრის მიზანიც სწორედ დევნილთა არსებული მდგომარეობის გაცნობა იყო.
„მომხსენებელმა ყურადღებით მოისმინა ჩვენი საქმიანობის შესახებ ინფორმაცია, დადებითი შეფასება მისცა ჩვენს მიერ გაწეულ საქმიანობას და დახმარება აღგვითქვა იმ საკითხების გადაწყვეტაში, რომელიც ჩვენთვის დღემდე პრობლემად რჩება. ეს არის დაფინანსების საკითხი. ჩვენი შესასრულებელი ამოცანები და პროგრამები ითხოვს სერიოზულ ფინანსურ რესურსებს. ამ მიმართულებით ვმუშაობთ, მაგრამ, ამავე დროს, არ ვუშვებთ არცერთ შესაძლებლობას, რომ დამატებით მოვითხოვოთ სახსრები იმისათვის, რომ სწრაფად და მაქსიმალურად ეფექტურად განხორციელდეს დევნილთა განსახლება. რა თქმა უნდა, ჩვენ ევროსაბჭოს დახმარებაზე სერიოზულ იმედებს ვამყარებთ, ჩვენ ანალოგიურ საკითხებს ვსვამთ გაეროს ლტოლვილთა უმაღლეს კომისარიატში, მხოფლიო ბანკთან და ა.შ სხვადასხვა ორგანიზაციებთან საგრანტო, კრედიტის, საბიუჯეტო და სხვა დახმარების კუთხით" - განაცხადა მინისტრმა.
დავით დარახველიძემ შეხვედრა საკანონმდებლო ცვლილებებზე საუბრით დაიწყო. მინისტრმა, დელეგაციას, დევნილთა შესახებ კანონპროექტში შეტანილი ახალი ცვლილებები გააცნო და რამდენიმე ძირითად ცვლილებაზე გაამახვილა ყურადღება. კერძოდ, აქამდე, კომპაქტურ და კერძო სექტორში მცხოვრები დევნილები სხვადასხვა რაოდენობის დახმარებას ღებულობდნენ. სავარაუდოდ, მომავალი წლის დასაწყისიდან მათი შემწეობა 45 ლარამდე გაიზრდება. ასევე, გაუქმდება კომპაქტური ჩასახლების ცნება.
დელეგაცია სასაზღვრო ზოლში მცხოვრები დევნილების საკითხითაც დაინტერესდა. როგორც მინისტრმა განმარტა, შექმნილია სამთავრობო კომისია, რომელიც წყვეტს ამ ტერიტორიაზე მცხოვრები მოსახლეობის სოციალურ და ეკონომიკურ საკითხებს.
რენე რუკე, საქართველოში ვიზიტის ფარგლებში, დევნილთა კომპაქტურ ჩასახლებებსაც მოინახულებს.
მასალის გამოყენების პირობები