ეროვნული ბიბლიოთეკა გამომცემლობებთან ერთად ახლადგახსნილ "ლიბერთი ელექტრონულ დარბაზში" ახალ პროექტს იწყებს. პროექტის ფარგლებში ყოველ სამშაბათს და ხუთშაბათს გაიმართება შეხვედრები გამომცემლობების მიერ შერჩეულ ყველაზე პოპულარულ თანამედროვე ქართველ ავტორებთან. "ლიბერთი ელექტრონული დარბაზის" პირველი სტუმარი იქნება მწერალი შორენა ლებანიძე, რომელიც გამომცემლობა "არტანუჯმა" წარადგინა.
შეხვედრა 5 ნოემბერს 19:00 საათზე საქართველოს პარლამენტის ეროვნული ბიბლიოთეკის „ლიბერთი ელექტრონულ დარბაზში" (გუდიაშვილის 7) გაიმართება. ავტორი აუდიტორიას წარუდგენს თავის მხატვრულ-დოკუმენტურ რომანს ,,ეს მე ვარ - ფიროსმანი".
შორენა ლებანიძე: ,,რომანი დიდი ქართველი მხატვრის, ნიკო ფიროსმანის თავისებურ ლიტერატურულ ვერსიას გვთავაზობს. ოღონდ ჩემი, როგორც ავტორის, წარმოსახვა ხელოვნებათმცოდნეთაგან მოპოვებულ დოკუმენტურ მასალებს, საარქივო წყაროებსა და ფიროსმანის თანამედროვეთა მოგონებებში ამოკითხულ რეალურ ცნობებს ემყარება. რომანის ძირითადი არსია იდუმალებით მოცული დიდი ხელოვანის მარადიული ძიების პროცესის ასახვა. ძიებისა, რომელიც ფიროსმანის სიცოცხლეშივე დაიწყო და დღემდე გრძელდება."
ღონისძიებაზე დასწრება თავისუფალია.
