საქართველოს შეიარაღებული ძალების ოფიცრები სრულიად საქართველოს კათოლიკოს-პატრიარქს, ილია II-ს სვეტიცხოვლის საკათედრო ტაძარში ესტუმრნენ. სამხედროებთან ერთად იმყოფებოდნენ, ასევე საქართველოს თავდაცვის მინისტრი ირაკლი ალასანია, გაერთიანებული შტაბის უფროსი, პოლკოვნიკი ირაკლი ძნელაძე და მინისტრის მოადგილე მიხეილ დარჩიაშვილი.
საქართველოს შეიარაღებული ძალების III ქვეითი ბრიგადის მეთაურმა, ვიცე-პოლკოვნიკმა მალხაზ მერლანმა და წვრთნებისა და სამხედრო განათლების სარდლის მოადგილემ, პოლკოვნიკმა ალექსანდრე კიკნაძემ უწმინდესსა და უნეტარესს, ISAF-ის მისიაში მონაწილე ქართული კონტინგენტის სახელით, სიმბოლური საჩუქარი - საქართველოს სახელწმიფო დროშა გადასცეს. ქართული დროშა ISAF-ის მისიის შესრულებისას ავღანეთში, ჰელმანდის პროვინციაში მდებარე ქართულ ბაზაზე ფრიალებდა.
ოფიცრებმა, საერთაშორისო მისიაში მონაწილე ქართველი სამხედროების სახელით, საქართველოს სახელწმიფო დროშა პრემიერ-მინისტრ ბიძინა ივანიშვილსაც გადასცეს.
ვიცე-პოლკოვნიკი მალხაზ მერლანი ოთხი თვის განმავლობაში მისივე ბრიგადის 33-ე ბატალიონის სამხედროებთან ერთად ავღანეთში იმყოფებოდა და სამშობლოში მათთან ერთად დაბრუნდა. პოლკოვნიკი ალექსანდრე კიკნაძე ავღანეთის ისლამურ რესპუბლიკაში ქართული კონტინგენტის უფროსი სამხედრო წარმომადგენლის რანგში 2012 წლის აგვისტოდან 2013 წლის ოქტომბრამდე იმყოფებოდა.
მასალის გამოყენების პირობები