არასამთავრობო ორგანიზაცია „ადამიანი, კანონი, თავისუფლება" 2013 წლის საპრეზიდენტო არჩევნების მიმდინარეობის პროცესს სასჯელაღსრულების დაწესებულებებში გახსნილ საარჩევნო უბნებზე აკვირდებოდა. ორგანიზაციის წარმომადგენლები აცხადებენ, რომ საერთო შეფასებით საარჩევნო პროცესებმა მშვიდ ვითარებაში ჩაიარა და მნიშვნელოვან დარღვევებს ადგილი არ ჰქონია.
ორგანიზაციის წარმომადგენლები აქტიურად აკვირდებოდნენ არჩევნების მიმდინარეობას სასჯელაღსრულების №8 დაწესებულებაში, სადაც განთავსებული იყო №115-ე და №116-ე საარჩევნო უბნები. მათი ინფორმაციით, №116-ე უბანზე დღის პირველ ნახევარში კომისიის წევრების მხრიდან ადგილი ჰქონდა არაორგანიზებულობას და დაბნეულობას თუმცა პრობლემა აღმოიფხვრა. საარჩევნო უბანზე არ დაფიქსირებულა მნიშვნელოვანი დარღვევა.
არჩევნები მშვიდ გარემოში მიმდინარეობდა რუსთავის №17-ე დაწესებულებაში, სადაც გახსნილ სპეც უბანზე რეგისტრირებული იყო 317 ამომრჩეველი, რომელთაგან 10 მსჯავრდებულს ჰქონდა ხმის მიცემის უფლება, 307 ამომრჩველი კი ციხის ადმინისტრაციის თანამშრომელი იყო. მსჯავრდებულმა პირებმა ისარგებლეს გადასატანი ყუთის მეშვეობითაც და ფარული კენჭისყრით დააფიქსირეს თავიანთი არჩევანი.
ორგანიზაციის წარმომადგენელი საარჩევნო პროცესების მიმდინარეობას აკვირდებოდა №20-ე საარჩევნო ოლქის №89-ე საარჩევნო უბანზე, რომელიც წარმოადგენდა ე.წ. სპეც. უბანს. აღნიშნულ უბანზე ხმას აძლევდნენ რუსთავის №5-ე ქალთა დაწესებულებისა და №6-ე მკაცრი რეჟიმის დაწესებულებაში მყოფი მსჯავრდებულები. აღნიშნულ უბანზე სადამკვირვებლო მისიას ახორციელებდა ეუთოს დემოკრატიული ინსტიტუტებისა და ადამიანის უფლებათა ოფისის ჩეხი და პოლონელი დამკვირვებელი.
დაკვირვების შედეგად დაფიქსირდა, რომ ხშირ შემთხვევაში საარჩევნო ხმის უფლების მქონე პატიმართა უმრავლესობა უარს ამბობდა არჩევნებში მონაწილეობაზე. არჩევნებზე მონაწილეობის არმიღების ერთ-ერთ ფაქტორად მსჯავრდებულთა მხრიდან სახელდება იუსტიციის სამინისტროს მიერ უფასოდ გაცებულ ID ბარათში საცხოვრებელ მისამართად, სასჯელაღსრულების დაწესებულების მისამართის მითითება.
აღსანიშნავია, რომ დაიწერა ოქმი იმ პატიმრების თაობაზე ვინც უარი განაცხადა არჩევნებში მონაწილეობაზე.
ზემოაღნიშნულიდან გამომდინარე, ორგანიზაცია მიმართვს ცენტრალურ საარჩევნო კომისიას განახორციელოს დამატებითი ტრეინინგები იმ თანამშრომლებისთვის, რომელთა გაშვება მოხდება სასჯელაღსრულების დაწესებულებებში განთავსებულ საარჩევნო უბნებზე.
ასევე, მივმართვთ იუსტიციის სამინისტროს, რომელიც უფასოდ ახორციელებდა ID ბარათების გადაცემას სარჩევნო ხმის უფლების მქონე მსჯავრდებულებზე, რაც ცალსახად დადებით მოვლენად შეიძლება შეფასდეს, სასჯელის ვადის მოხდის შემდეგ გაიცეს ახალი პირადობის დამადასტურებელი დოკუმენტი, სადაც მითითებული იქნება მათი რეალური საცხოვრებელი ადგილი. აქვე დავსძენთ, რომ აღნიშნული პროცედურაც განხორციელდეს უფასოდ.
