საქველმოქმედო ჰუმანიტარული ცენტრი „აფხაზეთი"-ს დახმარებით დევნილებს შეუძლიათ, ამხანაგობები შექმნან, თავიანთ ჩასახლებებს თავად მოუარონ, საკუთარი შემოსავალიც ჰქონდეთ და მცირე ბიზნესიც წამოიწყონ. აღნიშნულ შესაძლებლობას მათ პროექტი ,,ბინათმესაკუთრეთა ამხანაგობის შექმნა და განვითარება" აძლევთ, რომელსაც ცენტრი „აფხაზეთი" აშშ საერთაშორისო განვითარების სააგენტოს პროგრამის „ახალი ეკონომიკური შესაძლებლობები" ფინანსური მხარდაჭერით ახორციელებს.
პროექტის ფარგლებში იმერეთის, სამეგრელოს, შიდა ქართლისა და მცხეთა-მთიანეთის რეგიონებში დევნილთა 33 ჩასახლებაში შექმნილმა ამხანაგობებმა საჩუქრად სამშენებლო ინსტრუმენტები მიიღეს. ინსტრუმენტების შეძენა მოხდა იმ პროფესიების მიხედვით, რა პროფესიასაც კონკრეტულ ჩასახლებაში მცხოვრები დევნილები ფლობენ. კერძოდ, დევნილებს 33 ჩასახლებაში ცენტრმა „აფხაზეთმა" ჩაუტანა ელექტრიკოსის, მშენებელის, ინტერიერის დიზაინერის, დურგლის, სანტექნიკოსისა და სხვა ხელობისთვის საჭირო იარაღები. აღნიშნული კი დევნილებს შესაძლებლობას აძლევს, ჩასახლებაში კონკრეტულ პრობლემებსა თუ დაზიანებებს თავად მიხედონ. ასევე, მათ შეუძლიათ, შეკვეთით იმუშაონ და სამუშაო იარაღების გამოყენებით საკუთარი შემოსავალიც ჰქონდეთ. შემოსავლის გარკვეულ ნაწილი კი ამხანაგობის საერთო ფონდში გროვდება.
„დევნილებისთვის მხოლოდ საბინაო საკითხების მოგვარება პრობლემას არ წყვეტს. მათ კონკრეტულ ჩასახლებებში სჭირდებათ დასაქმება და შემოსავალი. შესაბამისად, ერთ-ერთი პროექტი, რომელსაც საქველმოქმედო ჰუმანიტარული ცენტრი „აფხაზეთი" ახორციელებს, დევნილებს შესაძლებლობას აძლევს დასაქმდნენ, ჩასახლებებს მოუარონ და დამატებითი შემოსავალიც ჰქონდეთ. აღნიშნული პროექტის ფარგლებში სამუშაო იარაღები 33 ჩასახლებას ჩავუტანეთ. პროექტი კი წლის ბოლომდე გაგრძელდება" - აცხადებს საქველმოქმედო ჰუმანიტარული ცენტრი „აფხაზეთი"-ს ხელმძღვანელი ეკა გვალია.
პროექტის ფარგლებში საქართველოს მასშტაბით ბინათმესაკუთრეთა და მობინადრეთა 41 ამხანაგობა შეიქმნა.
