„საერთაშორისო გამჭვირვალობა - საქართველო" საპრეზიდენტო არჩევნებს 370 ადგილობრივი დამკვირვებლით უწევს მონიტორინგს. ორგანიზაციის სტაციონარული დამკვირვებლები მთელი ქვეყნის მასშტაბით არიან გადანაწილებულნი 330 საარჩევნო უბანზე და 73 საარჩევნო ოლქიდან 66-ს ფარავენ. უბნების შერჩევა შემთხვევითი შერჩევის პრინციპით მოხდა. სტაციონარული დამკვირვებლების გარდა, საარჩევნო პროცესებს 40 მობილური ჯგუფიც ადევნებს თვალს. დღის განმავლობაში მობილური ჯგუფები განსაკუთრებულ ყურადღებას მიაქცევენ იმ უბნებს, სადაც პრობლემები წარმოიშვება.
არჩევნებისას მიმდინარე მოვლენების შეფასებებს „საერთაშორისო გამჭვირვალობა - საქართველო" არჩევნების დღის განმავლობაში სამჯერ წარმოადგენს: პრესკონფერენციები გაიმართება 12 საათზე, 16 საათზე, და 20 საათზე. ამასთანავე, არჩევნების დღის საერთო შეფასება გაკეთდება 28 ოქტომბერს 12 საათსა და 30 წუთზე.
