ქვეყნის განვითარებისა და მოდერნიზაციისთვის კი მოსახლეობამ ისეთი უმაღლესი ხელისუფალი უნდა აირჩიოს, რომელიც უპირობოდ გააგრძელებს ევროპული განვითარების გზას, რომელიც მრავალეთნიკური მოსახლეობის უდიდესი უმრავლესობით,რეფერენდუმით არის დამტკიცებული.
აღნიშნულია საპრეზიდენტო არჩევნების შესახებ Iveria.biz-ის რედკოლეგიის ედიტორიალში.
„მცოცავი ოუკუპაციისა და ევროპული ინტეგრაციის ეტაპობრიობის გამო, საქართველოს მეოთხე პრეზიდენტის ხუთწლიანი ვადა კვლავ რთული იქნება. ამ ძნელ პერიოდში, ქვეყანას წარსული ჭრილობების მომშუშებელი და დასავლური ფასეულობების მტკიცედ განმხორციელებელი დაუღალავი პროფესიონალი სჭირდება და არა უპრინციპო, კვლავ რუსეთის წყალობაზე უპერსპექტივოდ დამოკიდებული [პოპულისტი] პრეზიდენტი", - აცხადებს Iveria.biz-ის რედკოლეგია.
ედიტორიალში ნათქვამია, რომ აღნიშნულის მისაღწევად საჭიროა ამომრჩეველთა აქტიურობა. პასიურობით მხოლოდ მარგინალი კანდიდატი იხეირებს და ამის შედეგად პოლიტიკურ მეინსტრიმში მოხვდება. არჩევნებზე მისვლა და ყველას გადახაზვაც ასევე მარგინალის ინტერესებშია.
„ზემოთ თქმულის გათვალისწინებით, „ივერიას" მიაჩნია, რომ ოპოზიციის კანდიდატის გამარჯვების შემთხვევაში, ქვეყანას მეტი პოლიტიკური სტაბილურობა ელის, რადგან შემცირდება მხოლოდ უმრავლესობის ინტერესების დამცველი, ოპოზიციასთან შეუთანხმებელი გადაწყვეტილებების მიღების შანსი. შედეგად, მივიღებთ უფრო დაბალანსებულ პოლიტიკურ სისტემას, რომელიც მეტი ინტერესჯგუფის/ელექტორატის ინტერესებს გაითვალისწინებს. ეს ჭეშმარიტი დემოკრატიისაკენ გადადგმული კიდევ ერთი დიდი ნაბიჯი იქნება", - ნათქვამია საპრეზიდენტო არჩევნების შესახებ Iveria.biz-ის რედკოლეგიის ედიტორიალში.