ადგილობრივი თვითმმართველობის შესახებ კანონპროექტი საერთაშორისო ორგანიზაციებში გაიგზავნება. როგორც მთავრობის სხდომის დასრულების შემდეგ რეგიონული განვითარებისა და ინფრასტრუქტურის მინისტრმა დავით ნარმანიამ განაცხადა ეს მოხდება მას შემდეგ რაც ამ საკითხს საქართველოს მთავრობა განიხილავს.
"ჩვენ ვაპირებთ, რომ კანონპროექტი საერთაშორისო ორგანიზაციებში გავაგზავნოთ. ძირითადად არის ევროსაბჭო ვინც პასუხისმგებელი უწყებაა და ვისთანაც შეთანხმება ამ კანონპროექტის არის აუცილებელი. ოღონდ გაიგზავნება ეს მას შემდეგ, რაც საქართველოს მთავრობაზე განიხილება ეს საკითხი. გუშინ პრემიერთან ერთ-ერთი რიგითი სამუშაო შეხვედრა იყო, სადაც ძირითადი მიმართულებები და შესაჯერებელი საკითხები განვიხილეთ. რასაკვირველია, თანამშრომლობა იქნება როგორც საერთაშორისო ორგანიზაციებთან, ისევე ადგილობრივ არასამთავრობო ორგანიზაციებთან", - განაცხადა ნარმანიამ.
ნარმანიას განმარტებით ადგილობრივი თვითმმართველობის შესახებ კანონპროექტთან დაკავშირებით რამდენიმე სამინისტროს ჰქონდა შენიშვნა თუმცა ყველა მათგანი განიხილეს და გაიარეს.
