თბილისის მერია განცხადებას ავრცელებს, რომელსაც უცვლელად გავაზობთ:
კულტურული მემკვიდრეობის შესახებ, საქართველოს კანონში შეტანილი ცვლილებებთ, რომელიც მიმდინარე წლის 25 სექტემბრიდან ამოქმედდა, ქ. თბილისის მერიას ჩამოერთვა თბილისის ისტორიულ უბნებში მშენებლობის ნებართვის გაცემის უფლებამოსილება და იგი კულტურისა და ძეგლთა დაცვის სამინისტროს გადაეცა.
"აღნიშნულ ცვლილების მიღებასთან დაკავშირებით, რომელიც სწორედ კულტურის სამინისტროს დაჟინებული მოთხოვნით განხორციელდა, თბილისის მერიის მხრიდან არაერთი საჯარო განცხადება იქნა გაკეთებული მათ შორის იმის შესახებ, თუ რა უარყოფითი შედეგების მომტანი შეიძლება გახდეს ეს ცვლილებები და რამდენად მაღალია დედაქალაქის ისტორიულ უბნებში სამშენებლო პროცესის შეჩერების ალბათობა.
თბილისის მერია ხაზგასმით მიუთითებდა, რომ იმ პირობებში, როდესაც კულტურის სამინისტროს არ გააჩნია მშენებლობის ნებართვებზე იმ რაოდენობის განაცხადების მიღებისა და განხილვის, სათანადო მატერიალურ-ტექნიკური, პრაქტიკული თუ სხვა რესურსების მართვის გამოცდილება, როგორც ეს თბილისის მერიაში დამკვიდრდა უკანასკნელი წლების მანძილზე გატარებული სხვადასხვა ღონისძიებებისა და დაგროვილი პრაქტიკული გამოცდილების შედეგად, თბილისის ამ ტერიტორიებზე მდებარე შენობა-ნაგებობების დიდი ნაწილი, რომელთა მდგომარეობაც პირდაპირი მნიშვნელობით სავალალოა მათი ავარიულობის გამო, აღმოჩნდება შემდგომი სამშენებლო განვითარებისა და განახლების რელური პერსპექტივის გარეშე, რაც ერთმნიშვნელოვნად დააზიანებს თბილისის ამ ტერიტორიაზე, ისედაც მწვავე ავარიულ შენობებში მცხოვრები მოსახლეობის ინტერესებს.
უნდა აღინიშნოს, რომ იმ უარყოფითმა შედეგებმა რომლებზედაც კულტურის სამინისტროს, თბილისის მერია მიუთითებდა, კანონში ცვლილებების შეტანისთანავე იჩინა თავი, რისი ნათელი მაგალითი საქართველოს მთავრობისათვის წარდგენილი, სამინისტროს მომდევნო ახალი ინიციატივაა:
რამდენადაც გასაკვირი არ უნდა იყოს კულტურის სამინისტრომ კანონში ცვლილებების შეტანის შემდგომ, საქართველოს მთავრობას წარუდგინა ინიციატივა იმის შესახებ, რომ თბილისის მერიას დაევალოს კანონის ამოქმედებამდე დაწყებული წარმოებების ფარგლებში, კულტურული მემკვიდრეობის ძეგლებზე სამშენებლო ნებართვების გაცემა და მათზე ზედამხედველობა, ხოლო ქალაქის ისტორიულ ნაწილში არსებულ სხვა შენობებზე მშენებლობის ნებართვის გაცემაზე თანხმობის გაცემას კვლავ სამინისტრო აპირებს.როგორც ჩანს, სამინისტრო კვლავ თბილისის მერიასთან შეუთანხმებლად, მხოლოდ საკუთარი შეხედულებისამებრ ,,შერჩევით" ცდილობს ამ საკითხის დარეგულირებას და კანონით სამინისტროზე დაკისრებული უფლებამოსილების მხოლოდ ნაწილობრივ მერიაზე დელეგირებას, რაც სრულიად ალოგიკური და დაუსაბუთებელია.
იმ პირობებში, როდესაც კულტურის სამინისტრომ სწორედ კულტურული მემკვიდრეობის ძეგლების ,,გადარჩენისა და დაცვის" მოტივით პარლამენტს კანონში შეატანინა ცვლილებები და ჩამოართვა მერიას ძეგლებზე ნებართვების გაცემის უფლება, ამ უფლებამოსილების განხორციელების დაკისრებას საქართველოს მთავრობის დადგენილების მეშვეობით კვლავ, მერიაზე ცდლობს.
მიგვაჩნია, რომ მსგავსი შინაარსით ამ დადგენილების მიღება ეწინააღმდეგება, როგორც კულტურული მემკვიდრეობის შესახებ, საქართველოს კანონს, ასევე ადგილობრივი თვითმმართველობის შესახებ, საქართველოს ორგანულ კანონს, რომელიც სახელმწიფო მმართველობის ორგანოს მიერ, გარკვეული უფლებამოსილების ადგილობრივი თვითმმართველობის ორგანოზე დელეგირებისას, ადგილობრივი ორგანოს თანხმობის საჭიროებას ითვალისწინებს. შესაბამისად, საქართველოს მთავრობის მიერ, გადაწყვეტილების მიღება უნდა განხორციელდეს თბილისის მერიასთან შესაბამისი კონსულტაციის საფუძველზე".