თბილისის მერია შემოვლითი რკინიგზის პროექტის შეჩერებასთან დაკავშირებით, საჯარო განხილვებს იწყებს, სადაც ნებისმიერ დაინტერესებულ პირს შესაძლებლობა ექნება ამომწურავი ინფორმაცია მიიღოს თუ რა დადებითი მხარეები აქვს თბილისის ურბანული და ეკონომიკური განვითარებისთვის, საუკუნის პროექტის განხორციელებას.
თბილისის მერი გიგი უგულავა, დიდუბისა და ჩუღურეთის რაიონებში, რკინიგზის მიმდებარე ტერიტორიზე მცხოვრებ მოსახლეობას შეხვდა და პროექტის დასრულების აუცილებლობაზე მათთან ერთად იმსჯელა.
შეხვედრაზე გიგი უგულავამ საზოგადოებას დღეს, მერიის მიერ, გამოცხადებული ფოტო და ვიდეო კონკურსის დეტალები გააცნო.
კონკურსი - „თბილისი ცხოვრება რკინიგზის გარშემო" საზოგადოებისთვის იმ პრობლემების უკეთ გაცნობას ისახავს მიზნად, რაც ქალაქში სარკინიგზო ხაზის არსებობით არის გამოწვეული.
კონკურსში მონაწილეობის მსურველებმა 18 ოქტომბრიდან 8 ნოემბრამდე უნდა წარმოადგინონ, იმ მძიმე საცხოვრებელი პირობების ამსახველი ფოტო და ვიდეო მასალა, რაც რკინიგზის მიმდებარე ტერიტორიაზე მცხოვრებ მოსახლეობას აწუხებს.
კონკურსში მონაწილეობის მსურველებმა საკონკურსო მასალა უნდა ატვირთონ თბილისის მერიის ვებ-გვერდსა და სოციალურ ქსელში.
გამარჯვებულ ნამუშევრებს კომპეტენტური ჟიური გამოავლენს და მათი ავტორები თბილისის მერიის მიერ, სხვადასხვა ფასიანი საჩუქრებით დაჯილდოვდებიან.
