დღეს იუსტიციის სამინისტროს საჯარო რეესტრის ეროვნული სააგენტოს თავმჯდომარე ეკატერინე კერესელიძე და მისი მოადგილე პაპუნა უგრეხელიძე სააგენტოში დასაქმებულ შეზღუდული შესაძლებლობების მქონე თანამშრომლებს შეხვდნენ.
შეხვედრაზე ხელმძღვანელობამ შეზღუდული ფიზიკური შესაძლებლობების მქონე თანამშრომლებს გააცნო გადაწყვეტილება, რომლის მიხედვით შეიცვლება მათი სამუშაო გრაფიკი და სამსახურებრივი დატვირთვა. შინაარსობრივად გამრავალფეროვნდება და ოპტიმალურად განაწილდება მათი ფუნქციები.
გარდა ამისა, საააგენტოს ხელმძღვანელობის გადაწყვეტილებით, შეზღუდული შესაძლებლობების მქონე თანამშრომლებს საშუალება ექნებათ ისარგებლონ იმავე სადაზღვევო პაკეტით, რითიც დღეს სააგენტოს მენეჯმენტი სარგებლობს (პირველი კლასის სადაზღვევო პაკეტი) ასევე, შშმპ თანამშრომლებს საჯარო რეესტირს ხელმძღვანელების გადაწყვეტილებით, ახალი პორტატიული კომპიუტერები გადაეცემათ; ისინი უზრუნველყოფილი იქნებიან კორპორატიული სატელეფონო კავშირით, მათ სამუშაო ადგილებზე მიეწოდებათ მაღალსიჩქარიანი ინტერნეტი და ისარგებლებენ სხვა უპირატესობებით. სპეციალურად მათთვის იუსტიციის სახლებთან მოეწყობა ადაპტირებული ავტოსადგომი იზოლირებული შესასვლელით.
სააგენტოს ხელმძღვანელობა გაეცნო შშმ პირების საქმიანობას, სამუშაო პროცესში წარმოქმნილ ხარვეზებს და იმ პრობლემურ საკითხებს, რომლებიც სასწრაფოდ საჭიროებდა მოგვარებას.
როგორც შეხვედრაზე სააგენტოს თავმჯდომარემ ეკატერინე კერესელიძემ აღნიშნა, განსაკუთრებულ ყურადღება ეთმობა შშმპ თანაშრომლების პროფესიულ განვითარებას.
„ჩვენ ვცდილობთ მათი შესაძლებლობები მაქსიმალურად გამოვიყენოთ და ამით ხელი შევუწყოთ საზოგადოებაში მათ ინტეგრირებას", - აღნიშნა კერესელიძემ.
დღეისათვის იუსტიციის სამინისტროს სისტემაში 30-მდე შშმ პირია დასაქმებული, აქედან 15 საჯარო რეესტრის ეროვნულ სააგენტოში ასრულებს დაკისრებულ მოვალეობას.
შშმ პირთა დასაქმების პროექტის შესახებ:
მას შემდეგ, რაც საჯარო რეესტრის ეროვნული სააგენტო ელექტრონულ საქმისწარმოებაზე გადავიდა, შესაძლებელი გახდა სამუშაო პროცესის ინტერნეტის მეშვეობით განხორციელება. სწორედ დისტანციური მართვის შესაძლებლობა დაედო საფუძვლად იმ მოქალაქეთა დახმარების, დასაქმების, განვითარებისა და სამსახურებრივ წინსვლაში ხელშეწყობის სურვილს, რომლებიც ყველაზე მეტად საჭიროებდნენ მხარდაჭერას.
პროექტის განხორციელება 2008 წლიდან დაიწყო. პირველ ეტაპზე მოხდა დაკავშირება შეზღუდული შესაძლებლობების მქონე პირთა გაერთიანებებთან, რომლებმაც სააგენტოს მიაწოდეს იმ კანდიდატთა სია, რომელთაც ჰქონდათ უმაღლესი განათლება და კომპიუტერული პროგრამების საბაზისო ცოდნა, თუმცა არ შეეძლოთ გადაადგილება. უნარებიდან მნიშვნელოვანი იყო დაუბრკოლებელი მეტყველება, სმენა, მხედველობა და ერთგვაროვანი სამუშაოს შესრულებისათვის ფსიქოლოგიური მზადყოფნა.
შერჩეულ კანდიდატებს ჩაუტარდათ შესაბამისი სასწავლო კურსი. შემდეგ ეტაპზე, მათ საცხოვრებელ ბინაში სამუშაო ოთახი კომპიუტერული ტექნიკით აღიჭურვა, ჩაირთო შესაბამისი პროგრამები.
უკვე მეხუთე წელია პროექტის ფარგლებში დასაქმებული შშმ პირები აქტიურად განაგრძობენ მუშაობას საჯარო რეესტრის იურიდიულ, რეგისტრაციისა და კადასტრის, საერთაშორისო, შესყიდვების, მარკეტინგის, ადმინისტრაციისა და შიდა კონტროლის სამსახურებში.