ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ დევნილთა ხალახალი რეგისტრაციის პროცესის შესახებ "საქართველოს მთავრობა ღია მმართველობისთვის" ფარგლებში გამართულ პრესკონფერენციაზე ისაუბრა. მისი განცხადებით, ხელახალი რეგისტრაცია 110 ათასმა დევნილმა უკვე გაიარა. რეგისტრაციის პროცესი 27 დეკემბრამდე გაგრძელდება.
"რეგისტრაციის პროცესი დასრულდა კახეთში, სამეგრელოში, რაჭა-ლეჩხუმსა და გურიაში. რამდენიმე დღეში დასრულდება აჭარაში. ეს პროცესი მიმდინარეობს და მალე დასრულდება შიდა ქართლში. 20 ოქტომბრიდან პროცესი გაგრძელდება თბილისში. ძველი ბაზების მიხედვით, სულ 272 ათასი დევნილი ცხოვრობს საქართველოში. რეგისტრაციის პროცესში რამდენიმე ასეულმა დევნილმა სტატუსზე უარი თქვა ან აღიარა, რომ უკანონოდ ჰქონდა სტატუსი მინიჭებული", - განაცხადა მინისტრმა.
დავით დარახველიძემ დევნილთა განსახლების კრიტერიუმების შესახებაც ისაუბრა.
"იძლებით გადაადგილებულ პირთა - დევნილთა განსახლების ორგანიზების მიზნით, სამინისტროში მომზადდა და გამოიცა "დევნილთა გრძელვადიანი საცხოვრებელი ფართით უზრუნველყოფის წესის კრიტერიუმებისა და დევნილთა საკითხების შემსწავლელი კომისიის დებულების დამტკიცების შესახებ" მინისტრის ბრძანება. ამ ბრძანების გამოცემამდე არ არსებობდა სამართლებრივი აქტი, რომელიც დაარეგულირებდა დევნილთა გრძელვადიანი საცხოვრებელი ფართით უზრუნველყოფის პროცესებს", - აღნიშნა დარახველიძემ. მისი თქმით, ბინები დევნილ მოსახლეობას ახალი კრიტერიუმების მიხედვით გადაეცემა.
მაგალითისთვის, თბილისში, ყვარელის ქუჩაზე დასრულების პირას მისულ ობიექტზე სამინისტროში 1464 განაცხადი შევიდა. რადგან ამ ობიექტზე 85 ბინაა, საცხოვრებელი ფართები 85 უკიდურესად გაჭირვებულ ოჯახს გადაეცემა.
"ჩემი ამოცანაა, ყველა დევნილი დარწმუნდეს, რომ თუ მან ვერ მიიღო ბინა, ბინა მიიღო მასზე უფრო მძიმე მდგომარეობაში მყოფმა ოჯახმა", - განაცხადა დარახველიძემ.
