ორმოცი ათას დევნილს 200-ლარიანი გაზის ან ელექტროენერგიის ვაუჩერი დაურიგდება
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ, "საქართველოს მთავრობა ღია მმართველობისთვის" ფარგლებში, მედიის წარმომადგენლებს სამინისტროს მუშაობის შედეგები გააცნო.
როგორც მინისტრმა აღნიშნა, 2012 წლის 25 ოქტომბრიდან, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს გადაცემული აქვს 730 ბინა.
"1052-მა ოჯახმა საცხოვრებელი ბინები სიმბოლურ ფასად - ერთ ლარად მიიიღო. სამინისტრომ 60 ოჯახს სახლები საკარმიდამო მიწის ნაკვეთთან ერთად გადასცა. უკვე გამზადებული პროექტების მიხედვით, თბილისში, ვარკეთილის ჩასახლებაში თექვსმეტი 22 სართულიანი კორპუსი აშენდება, რომელშიც 4498 ბინა განთავსდება. კრწანისში, ფონიჭალის ჩასახლებაში კი რვა კორპუსი შენდება, სადაც 2130 ბინა განთავსდება. დაგეგმილია, ბათუმში, ექვსი კორპუსის აშენებაც, სადაც 1155 ბინა განთავსდება", - აღნიშნა დარახველიძემ.
რაც შეეხება უკვე აშენებული ბინების სარემონტო სამუშაოებს, მინისტრის თქმით, ასეთი სამუშაოები ჩაუტარდა 43 ობიექტს. ამ ობიექტებიდან თერთმეტს კი, სარემონტო სამუშაოები მერიის თანადაფინანსებით ჩაუტარდა.
დარახველიძის განცხადებით, 1186-მა ოჯახმა ერთჯერადი, 100-დან 500 ლარამდე დახმარება მიიღო, 142 ოჯახს კი 100-დან 300 ლარამდე ბინის ქირა გადაეცა.
მინისტრის თქმით, გამოზამთრების პროგრამის ფარგლებში, დაგეგმილია, 40 ათასი ჩასახლებულ და თვითგანსახლებულ დევნილთა ოჯახებისთვის 200 ლარიანი - გაზის ან ელექტროენერგიის ვაუჩერის დარიგება.
მასალის გამოყენების პირობები