ბატონო ზაქრო, ძალიან ცუდია, რომ, თქვენ, როგორც ადამიანი ცნობილი იმით, რომ კარგი იურისტი ხართ, ამ საკითხს არ ჩაუღრმავდით, არც საგარეო საქმეთა სამინისტროსთან გაიარეთ კონსულტაცია და აბსოლუტურად არასწორ ინტერპრეტაციას იძლევით. მით უფრო ცუდია, რომ ამას აკეთებს პარლამენტარი და ფრაქცია "ქართული ოცნების" თავმჯდომარე.

ახლა აგისხსნით რატომ არის ეს მცდარი ანალიზი:

12 აგვისტოს ხელშეკრულების მეხუთე მუხლი ამბობს:
Russian forces must withdraw to positions they held prior to the outbreak of hostilities. (რუსეთის ძალები უნდა გავიდნენ პოზიციებზე, რომლებიც მათ ეკავათ საომარი მოქმედებების დაწყებამდე) Pending an international peace-monitoring mechanism, Russian peacekeepers will take additional security measures (საერთაშორისო სამშვიდობო მონიტორინგის მექანიზმის შექმნამდე, რუსი სამშვიდობოები გაატარებენ დამატებით უსაფრთხოების ზომებს).

შესაბამისად, მეხუთე მუხლში ცალკეა საუბარი რუსეთის შეიარაღებულ ძალებზე (არა სამშვიდობოებზე!), რომლებიც უნდა გასულიყვნენ ომამდე არსებულ მდგომარეობაზე. ომამდე, ანუ 7 აგვისტომდე, არც ერთი რუსი ჯარისკაცი არ იმყოფებოდა საქართველოს ტერიტორიაზე!!! და თუ იმყოფებოდა, ამას რუსეთი არასოდეს აღიარებდა, რადგან ეს იქნებოდა ყველა შეთანხმების დარღვევა. ამიტომ, ჩანაწერი, რომ "რუსეთის ჯარები უნდა დაუბრუნდეს ომამდე არსებულ მდგომარეობას" ცალსახად ნიშნავს, რომ უნდა დატოვონ საქართველოს ტერიტორია. ამას რუსეთი დღეს ცალსახად არღვევს და ეს აღიარებულია ყველას მიერ!

ის, რომ მეხუთე მუხლში პირველ ნაწილში კონკრეტულად რუსეთის ჯარებზეა საუბარი იმითაც ჩანს, რომ მეორე ნაწილში ცალკეა საუბარი რუს სამშვიდობოებზე. ამ ხელშეკრულებით სამშვიდობოების ყოფნის ვადაც განისაზღვრა - სანამ საერთაშორისო მონიტორები არ ჩაანაცვლებდნენ. რეალურად, ევროკავშირის სადამკვირვებლო მისიის შემოსვლა ნიშნავდა იმას, რომ რუსეთის სამშვიდობოებმა (თუ კი ისინი ასეთად ჩათვლიან თავიანთ საოკუპაციო ძალებს) უნდა დატოვონ აფხაზეთი და ცხინვალი და იქ შეუშვან ევროკავშირის და სხვა მონიტორები. რუსეთი ამასაც არღვევს! ესეც ყველას მიერ არის აღიარებული!

უფრო მეტიც, რუსეთი არასოდეს იყენებს მეხუთე მუხლს თავის ცხინვალში და აფხაზეთში ყოფნის გასამართლებლად. არასოდეს!!! ჟენევაში 21 რაუნდში მივიღე მონაწილეობა და ზუსტად ვიცი მათი არგუმენტები! ასევე იციან თქვენმა თანაგუნდელებმაც, რომლებიც დღეს მონაწილეობენ მოლაპარაკებებში! მე ვიტყოდი, რომ, ნეტავ, გამოეყენებინა ეს არგუმენტი. მაგრამ ამას არ აკეთებდნენ რუსები, რადგან იციან, რომ ამ შემთხვევაში (1) უნდა აღიარონ, რომ ეს ხელშკერულება ავალდებულებს ჯარების გაყვანას და (2) მასზე შესაძლებელი იქნება წნეხის გაზრდა, რომ ჯარები გაიყვანოს ახალგორიდან, ჯავიდან, სოხუმიდან და ა.შ., ანუ იმ ტერიტორიებიდან, სადაც მას ადრე სამშვიდობოები არ ჰყავდა! რუსეთი არგუმენტად ყოველთვის იყენებს, რომ მან ეს მუხლი პირნათლად შეასრულა, რადგან აღიარა სამხრეთ ოსეთი და აფხაზეთი და, შესაბამისად, საქართველოს ტერიტორიაზე ჯარები არ ჰყავს!!! ხოლო იმ ორ "ქვეყანასთან" ორმხრივი ხელშეკრულებები აქვს გაფორმული და ამის საფუძველზე ათავსებს იქ ჯარებს!

აქაც პოლიტიკაზე ხომ არაა საუბარი? გადაამოწმეთ ნარატივი და იურიდიული ანალიზი! ნუ არევთ იმას, რაც დალაგებულია და აქამდე წარმატებით იყო გამოყენებული ჩვენი ეროვნული ინტერესებისთვის!!!!! ნუ აძლევთ კიდევ ერთ არგუმენტს მოსკოვს!!!", - განმარტავს სერგი კაპანაძე.
შეგახსნებთ, რომ ზაქარია ქუცნაშვილმა სააგენტო „ჯი-ეიჩ-ენთან" 12 აგვისტოს ხელშეკრულების „საბედისწერო დეტალებზე" ისაუბრა (http://ghn.ge/news-96824.html )