წმინდა სინოდის 11 ოქტომბრის სხდომაზე სასულიერო პირებმა ოკუპირებუ აფხაზეთსა და ცხინვალის რეგიონში არსებული მდგომარეობა და აღნიშნულ ტერიტორიებზე რუსეთის მართლმადიდებელი ეკლესიის წარმომადგენელთა მიერ საქართველოს საპატრიარქოს ნებართვის გარეშე განხორციელებული ქმედებები განიხილეს.
ამასთან, სინოდის ბოლო სხდომაზე ყურადღება გამახვილდა ბოლო პეროდში საქართველოში არსებულ რელიგიურ კონფლიქტებზე. სასულიერო პირები მოუწოდებენ ხელისუფლებას დროულად გამოიკვლიონ აღნიშნული დაპირისპირებების ინსპირატორები.
"უნდა შეწყდეს ცხინვალის რეგიონში რუსეთის სამხედროების მიერ მავთულხლართების გავლება და ყველაფერი გაკეთდეს, რათა დაიწყოს რუსეთის მიერ აღებული საერთაშორისო ვალდებულებების განხორციელებისა და დევნილთა დაბრუნების პროცესი. მასმედიის საშუალებებით ვრცელდება ინფორმაცია ცხუმ-აფხაზეთის ეპარქიაში რუსეთის მართლმადიდებელი ეკლესიის წარმომადგენლების უნებართვო შესვლისა და მათ მიერ ახალი ტაძრის საძირკვლის კურთხევის შესახებ ტკვარჩელსა და სოხუმთან განთავსებულ სამხედრო ბაზებზე, რაც საეკლესიო კანონების უხეში დარღვევაა. როგორც ცნობილია, აფხაზეთში ტაძრის მშენებლობის კურთხევას გასცემს სრულიად საქართველოს კათოლიკოს პატრიარქი. სამწუხაროდ არაერთხელ ჰქონდა ადგილი მუსლიმებსა და ქრისტიანებს შორის სიტუაციის დაძაბვის მცდელობას, რაც ხელოვნურად შექმნილი პრობლემაა. წმინდა სინოდმა დაადგინა: ეთხოვოს ხელისუფლებას დროულად გამოიძიონ განვითარებული მოვლენები,"- განაცხადა საპატრიარქოს პრეს-სამსახურის უფროსმა დეკანოზმა დავით შარაშენიძემ.
წმინდა სინოდის ბოლო სხდომაზე ეპარქიების საკითხიც განიხილეს. სხდომის წევრთა გადაწყვეტილებით, 4 ეპარქია გაიყო, საეპისკოპოსო კანდიდატად კი, 7 სასულიერო პირი შეირჩა. ამავე სხომაზე 3 მღვდელმთავარი გახდა ტიტულარული და ისინი პენსიაზე არ გასულან. ორი მათგანი - მეუფე თადეოზი და მეუფე დავით ტიკარიძე მოღვაწეობას ეპარქიის გარეშე გააგრძელებენ, მეუფე ვახტანგ ახვლედიანი კი, შვედეთის სამრევლოზე იზრუნებს.