საქართველოს ფინანსთა მინისტრმა, ნოდარ ხადურმა მონაწილეობა მიიღო საერთაშორისო სავალუტო ფონდის ყოველწლიურ კონფერენციაში, რომელზეც მსოფლიო ეკონომიკაში მიმდინარე პროცესებთან ერთად, გარდამავალი ეკონომიკის მქონე ქვეყნებში არსებული მდგომარეობა განიხილებოდა.
ფინანსთა მინისტრი ასევე, შეხვდა საერთაშორისო სავალუტო ფონდის აღმასრულებელ დირექტრს, სსფ-ში ნიდერლანდების ჯგუფის ხელმძღვანელს, მენო შნელს (Menno Snel), ევროპის რეკონსტრუქციისა და განვითარების ბანკის (EBRD) აღმასრულებელ დირექტორს თურქეთში, აღმოსავლეთ ევროპის, კავკასიისა და ცენტრალური აზიის ქვეყნებში, ოლივიე დაკამს (Olivier Descamps) და ევროპის საინვესტიციო ბანკის ვიცე-პრეზიდენტს ვილჰელმ მოლტერერს.
„საერთაშორისო სავალუტო ფონდის აღმასრულებელ დირექტორთან, მენო შნელთან შეხვედრაზე ვისაუბრეთ საქართველოს ეკონომიკაში არსებულ მდომარეობაზე, იმ პროგნოზებზე, რომელიც გამოაქვეყნა საერთაშორისო სავალუტო ფონდმა. როგორც გაირკვა, იგი თავადაც გაკვირვებულია ამგვარი პროგნოზით და მივიღეთ პირობა, რომ აღნიშნული შეფასება გადაიხედება.
რაც შეეხება შეხვედრებს ჩვენს მთავარ ინვესტორებთან - ევროპის რეკონსტრუქციისა და განვითარების ბანკის აღმასრულებელ დირექტორთან ვისაუბრეთ ბანკის მიერ განხორციელებულ პროექტებზე. ისინი აპირებენ გააქტიურონ თანამშრომლობა საქართველოსთან. ნოემბერში ბანკისგან ველოდებით საინტერესო სურპრიზს, რომლის გაჟღერების უფლებაც ჯერ არ მაქვს.
ევროპის საინვესტიციო ბანკის ვიცე-პრეზიდენთან შეხვედრაზე განვიხილეთ ბანკის უახლოესი გეგმები საქართველოში. როგორც იცით ბანკი აქტიურადაა ჩართული ინფრასტრუქტურული პროექტების განხორციელებაში. ბანკი გეგმავს ინვესტირებას კერძო სექტორში. აგრეთვე, აპირებენ კერძო-საჯარო თანამშრომლობის ე.წ. PP პროექტებში ჩართვას.
სწორედ აღნიშნული ტიპის შეხვედრები მაძლევს რწმენას და გარანტიას, რომ მომავალ წელს საქართველოში ინვესტიციების რაოდენობა გაიზრდება," - განაცხადა საქართველოს ფინანსთა მინისტრმა ნოდარ ხადურმა.
„მიმაჩნია, რომ კარგია საქართველოს დელეგაციის ჩამოსვლა წლიურ შეხვედრაზე. ეს საუკეთესო საშუალებაა საერთაშორისო ასპარეზზე შეხვდე პარტნიორებს. დღეს ძალიან ბევრი ვისაუბრეთ ეკონომიკური აღმავლობისა და განვითარების პერსპექტივაზე, მათ შორის საქართველოში. ვფიქრობ, საქართველოს დელეგაციას პოზიტიური შეხვედრები ჰქონდა საერთაშორისო სავალუტო ფონდის ეკონომისტებთან, ასევე, ჰოლანდია-ბელგიის ჯგუფის ხელმძღვანელებთან, რომლებიც ფონდში საქართველოს წარმოადგენენ", - განაცხადა საერთაშორისო სავალუტო ფონდის აღმასრულებელმა დირექტრმა, მენო შნელმა.
„საქართველო ევროპის საინვესტიციო ბანკისთვის ერთ-ერთი ძირითადი პარტნიორია აღმოსავლეთ პარტნიორობის რეგიონში. პოზიტიური გამოცდილება გვაქვს ინფრასტრუქტურულ პროექტებში თანამშრომლობის კუთხით. აგრეთვე გვაინტერესებს ისეთი პროექტები, როგორიცაა წყლის რესურსები, მყარი ნარჩენების მართვა, კერძო სექტორის მხარდაჭერა. გვინდა ხელი შევუწყოთ საშუალო და მცირე ბიზნესს, რათა ქვეყნის ეკონომიკა განვითარდეს. ჩვენი სურვილია, გავაუმჯობესოთ საქმიანობა საქართველოში", - განაცხადა ევროპის საინვესტიციო ბანკის ვიცე-პრეზიდენტმა ვილჰელმ მოლტერერმა.