საქართველოს პრემიერ-მინისტრმა ბიძინა ივანიშვილმა ევროკავშირს მოუწოდა უფრო გააქტიურდეს და გააგრძელოს ქმედითი არაღიარების პოლიტიკა საქართველოს ოკუპირებული ტერიტორიების მიმართ. ამის შესახებ პრემიერ-მინისტრმა ბიძინა ივანიშვილმა ევროკავშირის საბჭოს პოლიტიკური და უსაფრთხოების კომიტეტის წევრ ელჩებთან შეხვედრისას განაცხადა.
,,მინდა საქართველოს მთავრობის სახელით მივმართო ევროკავშირს არსებული სერიოზული საგარეო გამოწვევების გათვალისწინებით გააძლიეროს აღმოსავლეთ ევროპის პარტნიორი ქვეყნების მხარდაჭერა და უზრუნველყოს შეთანხმებული მიზნების რეალიზაცია ვილნიუსის სამიტისთვის. მაქსიმალურად შეუწყოს ხელი საქართველო-ევროკავშირს შორის ასოცირების შესახებ შეთანხმების პარაფირებას, ღრმა და ყოვლისმომცველი თავისუფალი სავაჭრო სივრცის ჩათვლით. გააგრძელოს ქმედითი არაღიარების პოლიტიკა საქართველოს ოკუპირებული ტერიტორიების მიმართ", _განაცხადა ბიძინა ივანიშვილმა.
შეგახსენებთ, რომ თბილისში ევროკავშირის საბჭოს პოლიტიკური და უსაფრთხოების კომიტეტის წევრს ელჩები იმყოფებიან. ვიზიტის ფარგლებში დაგეგმილია აღმასრულებელ და საკანონმდებლო ხელისუფლების წარმომადგენლებთან შეხვედრა.
შეხვედრაზე მხარეები განიხილავენ საქართველოსა და ევროკავშირს შორის თანამშრომლობის გაღრმავების პერსპექტივებს, ქვეყანაში მიმდინარე პროცესებსა და დაგეგმილ ვილნიუსის სამიტს.
