ხვალ, 1-ელ ოქტომმბერს, პარლამენტში საპარლამენტო უმრავლესობა და უმცირესობა ქვეყანაში არსებულ ეკონომიკურ მდგომარეობაზე დებატებს გამართავენ. უმრავლესობის წევრის გია ცაგარეიშვილის განცხადებით, ქვეყანაში არსებულ ეკონომიკურ ვითარებაზე დებატებისთვის მათი ოპონენტები საგულდაგულოდ ემზადებიან, თუმცა როგორც დეპუტატი ამბობს, არც უმრავლესობა მიდის მოუმზადებელი.
„ჩვენ გამოვითხოვეთ მთავრობიდან ყველა ციფრი. მე არა მგონია „ნაციონალურ მოძრაობას" უფლება ჰქონდეს ბიზნესსა და ეკონომიკის განვითარებაზე ისაუბროს. ძალმომრეობა იყო მათი პოლიტიკა. პრობლემა არსებობს და ჩვენ ამ პრობლემას არ ვმალავთ როგორც წინა ხელისუფლება აკეთებდა. ვმუშაობთ მის მოგვარებაზე და ეკონომიკაში სიტუაცია ნელ-ნელა დალაგდება," - ამბობს გია ცაგარეიშვილი.
შეგახსენებთ, რომ ეკონომიკის თემაზე დებატები პარლამენტში ხვალ, უმცირესობის მოთხოვნით გაიმართება.
